Stay safe palagi ngayong Pasko at Bagong Taon!

@Editorial | December 20, 2020

Nagpaalala ang awtoridad na bawal ang lahat ng uri ng public fireworks display at tanging community fireworks displays lang na pangungunahan ng local government units (LGUs) ang pinapayagang gamitin.

Istriktong ipatutupad ng Department of Interior and Local Government (DILG) ang pagbabawal sa pagpapaputok ngayong Kapasukuhan at sa Bagong Taon.

Kaugnay nito’y inatasan ang PNP na kumpiskahin ang mga ilegal na paputok at arestuhin ang mga pasaway na mahuhulihan nito.

Kabilang sa mga ilegal na paputok ay ang piccolo, watusi, giant whistle bomb, giant bawang, large Judas belt, super lolo, lolo thunder, atomic bomb, atomic bomb triangulo, pillbox, boga, kwiton, goodbye Earth, goodbye bading, hello Columbia at goodbye Philippines.

Samantala, magsagawa rin ng inspeksiyon sa “manufacturing complex, warehouse, at processing area” ng mga gumagawa at dealers ng paputok.

Karapatan nating ipagpasalamat na sa kabila ng mga hindi magandang pangyayari ngayong 2020 ay umabot tayo sa punto na sasalubungin natin ang panibagong taon.

Pero isipin natin na ang selebrasyon ay puwedeng maging masaya at makabuluhan nang hindi inilalagay sa alanganin ang kalusugan at kaligtasan.

Muli, hindi tayo pinagbabawalang mag-celebrate, basta stay safe lang tayo palagi.