Social media fame, hindi lisensiya para lumabag sa batas

by Info @Editorial | November 22, 2026

Nakaaalarma ang pagiging pasaway ng ilang content creator na ginagawang katatawanan o pagkakakitaan ang paglabag sa batas-trapiko.
Mula sa pagmomotorsiklo nang walang helmet, delikadong pagmamaneho hanggang sa paggawa ng iba't ibang pakulo sa kalsada, tila mas mahalaga pa sa kanila ang makakuha ng maraming views at likes kaysa sa kaligtasan ng publiko.
Hindi dapat gawing dahilan ang paggawa ng content upang balewalain ang batas. Higit sa lahat, hindi dapat isugal ang buhay ng ibang motorista at pedestrian para lamang sumikat sa social media.
Dapat maging mahigpit ang Land Transportation Office (LTO) sa pagpapanagot sa mga ganitong indibidwal. Hindi porke maraming followers ay maaari nang umasta na parang hindi saklaw ng batas.
May pananagutan din ang mga content creator sa kanilang mga tagasubaybay, lalo na sa mga kabataang maaaring gumaya sa kanilang ginagawa.
Kung gustong sumikat, gumawa ng makabuluhang content. Hindi kailangang maging pasaway, lumabag sa batas at ilagay sa panganib ang kapwa para lamang maging viral.
Ang kalsada ay hindi playground o lugar para sa pagpapasikat. Ang batas-trapiko ay para sa lahat, sikat man o hindi.



Comments