ASEAN Summit tapos na, resibo ng gastos ilabas na!

by Info @Editorial | November 19, 2026

Tapos na ang ASEAN Summit sa Pilipinas, pero hindi dapat matapos dito ang usapin kung sulit ba ang pondong ginastos ng pamahalaan para sa malaking pagtitipon ng mga lider ng iba't ibang bansa.
Hindi biro ang paghahanda sa ganitong okasyon. Mula sa seguridad, transportasyon, pagtanggap sa mga delegado hanggang sa iba pang gastusin, pera ng taumbayan ang ginagamit kaya nararapat lamang na malaman ng publiko kung saan ito napunta.
Mahalaga ang ASEAN Summit dahil pagkakataon ito upang palakasin ang relasyon ng Pilipinas sa mga karatig-bansa at iba pang pandaigdigang katuwang. Pero hindi sapat ang matagumpay na programa, magagarang pagtanggap at magagandang talumpati kung walang konkretong pakinabang ang mga Pilipino.
Sa panahong marami pa ring pamilya ang nahihirapan sa araw-araw na gastusin, kailangang tiyaking may malinaw na balik sa bansa ang bawat pisong inilaan sa summit.
Dapat makita ang resulta sa mas maraming oportunidad sa trabaho, pamumuhunan at
mga kasunduang tunay na mapapakinabangan.
Nararapat ding ilahad ng pamahalaan ang kabuuang gastos at mga naging resulta ng pagtitipon. Hindi ito simpleng pagkuwestiyon sa pagho-host ng Pilipinas kundi bahagi ng pananagutan sa paggamit ng pampublikong pondo.



Comments