Sen. Padilla, sasamahan si Sen. Dela Rosa sa kulungan, joke lang pala

ni Pablo Hernandez III @Prangkahan | July 20, 2023

MALABONG MATUPAD ANG SINABI NI P-BBM NA ‘DI MALULUSTAY ANG P500-B MAHARLIKA INVESTMENT FUND KASI PARANG P20 PER KILONG BIGAS DIN ‘YAN NA HINDI NATUPAD -- Sabi ni Pangulong Ferdinand “Bongbong” Marcos Jr. (P-BBM) ay hindi raw malulustay ang Maharlika Investment Fund (MIF) na ang P500 billion ipangpopondo rito ay sa kaban ng bayan at pera ng mamamayan na galing sa Social Security System (SSS), Government Service Insurance System (GSIS), PhilHealth, Pag-IBIG Fund, Land Bank of the Philippines (LBP) at Development Bank of the Philippines (DBP) kukunin.

Mahirap paniwalaan ang sinabing ito ni P-BBM kasi maihahalintulad ang statement niyang ito sa campaign promise niya noon na gagawin niyang P20 per kilo ang bigas na hanggang ngayon ay hindi nagkaroon ng katuparan, period!

◘◘◘

KAPAG SI P-BBM PRINESYUR NG UNITED NATIONS BAKA IPAHULI AT ISURENDER NIYA SA ICC SINA EX-P-DUTERTE AT SEN. DELA ROSA -- Matapos i-reject ng International Criminal Court (ICC) ang hirit ng Philippine government na itigil ang imbestigasyon ng ICC prosecutors kaugnay sa bloody drug war ng nakaraang Duterte administration, sinabi ni Sec. Boying Remulla ng Department of Justice (DOJ) na kahit daw maglabas ng warrant of arrest ang ICC ay hindi papayag ang Marcos administration na dakpin at i-surender sa ICC court sina ex-P-Duterte at Sen. Ronald Dela Rosa.

‘Yan ang sabi sa ngayon ni Sec. Remulla na protektado nila sina ex-P-Duterte at Dela Rosa, pero kapag prinesyur ng United Nations (UN) ang Marcos administration na dakpin at i-surender sa ICC ay baka tumalima si P-BBM, ipahuli at bitbitin sa The Netherlands ang mga sangkot sa Extrajudicial Killings (EKJ) sa ‘Pinas, boom!

◘◘◘

SINABI NI SEN. PADILLA NA SASAMAHAN NIYA SA KULUNGAN SI SEN. DELA ROSA, JOKE LANG? -- Noong March 30, 2023, inanunsyo ni Sen. Robin Padilla na kapag inaresto raw ng ICC ang kapwa niya senador na si Dela Rosa, kahit hindi raw siya kasama sa nakasuhan ay sasama raw siyang magpakulong sa ICC jail sa The Netherlands. Pero nang i-reject ng ICC ang hirit ng Philippine government na itigil ang imbestigasyon sa EJK sa ‘Pinas, at dahil diyan, posibleng magpalabas na ng warrant of arrest ang ICC laban sa mga sangkot sa EJK sa ‘Pinas, ay napakatahimik, at dedma na lang sa isyung ito si Sen. Padilla.

Ibig sabihin niyan na ang pananahimik ni Padilla ngayon sa isyung ito ay indikasyong hindi niya sasamahan sa kulungan si Dela Rosa, at kulang na lang sabihin niyang joke lang at pabida lang niya ang sinabi noon na magpapakulong din siya, kapag ikinulong sa ICC jail si Dela Rosa, ha-ha-ha!

◘◘◘

NAG-LEAVE THE PHILIPPINES ANG PASIMUNO NG PALPAK NA ‘LOVE THE PHILIPPINES’ SLOGAN -- Ang pasimuno ng “Love the Philippines” slogan na si Tourism Sec. Christina Frasco, ay nag-“Leave the Philippines”.

Nag-leave of absence kasi sa Department of Tourism (DOT) at nagtungo si Sec. Frasco sa Norway para ‘ika nga “magpalamig” at makaiwas sa mga batikos sa palpak na ideya niyang “Love the Philippines” slogan, he-he-he!