Santos, nagka-COVID-19, matapos tamaan si Teixeira, atras ang laban

ni Gerard Arce - @Sports | September 21, 2020

Muli na namang maiuurong ang nakatakdang laban nina dating light-heavyweight title contenders Glover Teixeira at Thiago Santos sa Oktubre 3 matapos namang magpositibo sa coronavirus disease (COVID-19) ang huli.

Inihayag ni UFC President Dana White na tinamaan din ng sakit ang 36-anyos na Rio de Janeiro-native na na si Santos (21-7, 13-6 UFC) matapos kumpirmahin sa report ng Combate, kung kaya’t muli na namang iuusog ang laban sa hindi pa malamang petsa.

“The fights out,” sambit ni White sa ginanap na press-conference ng contender series. “I don’t know what we gonna do yet, we really got there yet,” dagdag ni White hinggil sa kinahaharap ng laban ng dalawa.

Minsan ng naunsyami ang orihinal na pagtatapat ng dalawa noong Setyembre 12 sa UFC on ESPN+ 35 matapos na magkaroon ng nakahahawang sakit ang 40-anyos na si Teixeira (31-7, 14-5 UFC).

Kinumpirma ng UFC officials na ililipat na lang ang laban ng dalawa sa darating na Oktubre 3, kung saan hindi na ito magiging 5-round main event, kundi isa na lang undercard sa salpukan nina dating UFC bantamweight champion Holly Holm at Irene Aldana.

Parehong umaasa ang kasalukuyang No. 4 ranked si Teixeira at No. 2 na si Santos na muling makalabang muli sa World title fight makaraang maging biktima ni No. 1 pound-for-pound fighter at dating UFC light-heavyweight champion Jon “Bones” Jones na nagdesisyong bitawan ang titulo at umakyat ng heavyweight ranks.

Tinalo ni Jones si Teixeira (31-7) noong UFC 172 sa pamamagitan ng unanimous decision noong April 26, 2014, habang nagresulta sa split decision ang laban ni Santos (21-7) sa UFC 239 noong Hulyo 6, 2019.

Papalit bilang bagong main event sa bakbakang Teixeira-Santos ang salpukan nina Michelle Waterson at Angela Hill sa women’s strawweight division.

Hawak ng dating Brazilian wrestling team na si Teixeira ang four-fight winning streak kina Karl Roberson, (submission), Ion Cutelaba (Submission), Nikita Krylov (split decision) at Anthony Smith (KO), habang muling magbabalik sa octagon ring ang dating Ultimate Fighter graduate na si Santos matapos ang huling laban nito kay Jones.