Sa work-from-home, lugi negosyo

ni Ka Ambo - @Bistado | March 31, 2022

Nagkakainitan na nang todo ang US at Russia.

Tumitiktak nang mabilis ang nuclear clock.

◘◘◘

NATENGGA lang ang mga COVID vaccine.

Hindi kaya ito mag-expired?

◘◘◘

SOCIAL media pictures ang ginagawang panukat sa malakas na kandidato.

Tumatabo ang mga photoshop artist.

◘◘◘

MALAYO na ang naabot ng teknolohiya sa pangangampanya.

Kumpara sa 2019, ibang-iba na ang diskarte ngayon.

Sa 2025, lalong pambihira ang mga magaganap.

◘◘◘

PINIPIGIL ng gobyerno ang “work-from-home”.

Kontra kasi ito sa malusog na ekonomiya.

Magtatrabaho kasi ang mga obrero nang hindi umaalis ng bahay.

◘◘◘

KAPAG mayorya ng obrero ay naka-work-from-home, hindi makakarekober ang mga nagpaparenta ng gusali, kuwarto at iba pa.

Tutumal din ang mga negosyo sa transportasyon, karinderia at iba pang kaugnay nito.

◘◘◘

KAPAG kasi naka-WFH, puwedeng hindi na maligo ang mga obrero, hihina ang benta ng damit, pampaganda, barbershop parlor at iba pa.

Kasi’y ang mga tao ay puwedeng magtrabaho kahit nakapambahay lang.

◘◘◘

MAHIRAP pigilin ang WFH, kasi’y nakapasok na ngayon 'yan sa modernong kultura.

Kahit naman ang online class sa iskul ay maipapasok na sa kurikulum o sistema ng edukasyon.

◘◘◘

KAILANGAN nang baguhin ang Konstitusyon at iba pang regulasyon sa lipunan.

Inobasyon at pambihirang ideya ang kailangan ng gobyerno at pribadong sektor.

◘◘◘

KAILANGAN sa gobyerno ang modernong kaisipan ng mga kabataan imbes na kontrolin ito ng lipas nang utak ng matatanda.

Kailangan ang isang malawakan at napapanahong pagbabago sa ating lipunan.

◘◘◘

NASAPOL ng intuition ni dating Pangulong Marcos ang second millennium.

Kailangan natin ang isang “tunay na ganap na Bagong Lipunan”.

Magawa kaya 'yan ni BBM sakaling magwagi?

◘◘◘

DUMATING sa bansa ang mga ehekutibo ng SpaceX.

Ibig sabihin, makikipagsabayan na rin ang Pilipinas sa modernong teknolohiya.

◘◘◘

MATATALINO ang mga Pinoy kaya’t malaki ang tsansa na sorpresang magiging superpower ang ating bansa.

Iyan ay sa pasubaling hindi tayo sasakupin at guguluhin ng karatig bansa.

◘◘◘

HUMAN resources ang pinakamalaking kayamanan ng Pilipinas.

Iyan ay binubungkal at nililinang mismo ng sarili mong pagkatao—wala nang iba pa.