Sa loob ng Senado... Robin at Jonvic, nagkapisikalan

ni Mylene Alfonso @News | June 5, 2026

Photo: Circulated / One

Nagkatulakan sina Senador Robin Padilla at Interior and Local Government Secretary Jonvic Remulla sa loob ng Senado nitong Huwebes nang dumating ang 18 nagpakilalang mga dating sundalo na naghatid umano ng mga maleta na may lamang pera sa ilang opisyal ng gobyerno.

Nangyari ang insidente sa nakatakdang pagdinig ng Blue Ribbon Committee na pinamunuan ni Sen. Pia Cayetano, kaugnay ng flood control scandal.

Batay sa video, makikitang nagkaroon ng komprontasyon at paghaharap sina Padilla at Remulla.

Kasama ni Padilla ang grupo ng mga umano’y mga dating sundalo at si Cayetano.

Sa huli, nakalusot din ang grupo nina Padilla patungo sa session hall na pinagdausan ng pagdinig.

Samantala, mariing namang iginiit ni Remulla na puwersahan siyang itinulak ni Padilla papasok sa plenaryo sa kalagitnaan ng pagharang sa ex-Marines.

Ani Remulla, nangyari ang insidente habang siya'y palabas na ng gusali habang papasok naman sa plenaryo sina Padilla at Cayetano kasama ang ilang Marines.

Ayon sa kalihim, nasa Senado siya sa kahilingan ni Senate President Pro Tempore at Acting Senate President Sherwin Gatchalian upang tiyakin ang kaayusan at seguridad sa loob ng mga pasilidad ng Senado.

Nang tanungin kung layunin niyang harangin si Padilla at ang mga kasama nito, mariing itinanggi ni Remulla ang paratang.

“Paano ko naman magagawa iyon? Mag-isa lang ako,” aniya.