Sa laki ng 2026 national budget lalong lulubog sa utang ang ‘Pinas dahil malaki rin uutangin ng Marcos admin

ni Pablo Hernandez @Prangkahan | August 18, 2025

AYAW NG MAJORITY PINOY SA MGA NANINIRA KAYA KAPAG HINDI TUMIGIL ANG MGA LOYALISTA AT DILAWAN SA PANINIRA KINA VP SARA AT SEN. BONG GO, SURE WIN SILA SA 2028 PRESIDENTIAL & VP ELECTION -- Kung mga pro-Marcos and loyalists ang umaatake kay Vice Pres. Sara Duterte-Carpio ay mga “dilawan” supporter naman ang umaatake kay Sen. Bong Go.

Hindi rin maitatanggi na ang mga atake ng mga pro-Marcos supporter kay VP Sara, tulad ng pagkuwestiyon sa kanyang confidential funds na humantong para sampahan siya ng mga kasong impeachment, ay dahil lagi siyang top sa mga 2028 presidential survey, at sa parte naman ni Sen. Bong Go na dahil sa mga survey ay siya ang laging top sa mga 2028 vice presidential survey kaya binuhay ang mga lumang isyu sa kanya patungkol sa pagiging kontraktor ng kanyang ama at half-brother.

Sa totoo lang, ayaw ng majority Pinoy sa mga taong naninira ng kapwa, na ‘ika nga ay nakikisimpatiya pa ang mayoryang mamamayan sa mga taong sinisiraan.

Kaya kapag hindi tumigil ang mga pro-Marcos at “dilawan” supporters ng paninira kina VP Sara at Sen. Bong Go ay nasa kanila ang simpatiya ng mayoryang Pinoy, sure win na sila sa pagka-presidente at bise presidente sa 2028 elections, sigurado ‘yan!

XXX

KAY FPRRD, MALAPIT KA MAN SA KANYA PERO KAPAG NASANGKOT KA SA CORRUPTION SIBAK KA, AT DAHIL WALANG NAKIKITANG BAHID NG CORRUPTION KAY SEN. BONG GO KAYA ‘DI NIYA SINIBAK SA HALIP SINUPORTAHAN PA NANG KUMANDIDATONG SENADOR -- Sa uri ng pagkatao ni former Pres. Rodrigo Roa Duterte (FPRRD), wala itong sinasanto sa paglaban sa corruption kahit mga taong malapit sa kanya ang tamaan.

Ihalimbawa natin si former National Irrigation Administration (NIA) Administrator Peter Lavina, na tulad ni Sen. Bong Go ay malapit kay FPRRD, na noong alkalde pa ng Davao City si Digong, si Lavina ang kanyang special assistant at si Bong Go naman ang executive assistant, at nang kumandidato sa siya (Digong) sa pagka-presidente, si Lavina ang presidential campaign spokesman at si Bong Go ang personal assistant.

Nang maging presidente si Digong, itinalaga niya si Bong Go na Special Assistant to the President (SAP) at si Lavina ang administrator ng NIA noong July 2016, at makalipas ang halos 8 buwan, “may umusok” na mayroong ginawang corruption si Lavina sa NIA kaya agad itong sinibak ng noo’y Pres. Duterte.

‘Ika nga, noon pa man ay walang nakikitang bahid ng corruption si Sen. Bong Go (SBG), fake news na kumukuha siya ng kontrata para sa kanyang ama at half-brother kaya hindi nito naranasan na masibak ‘di tulad ng nangyari kay Lavina, at sa halip nang kumandidato si SBG sa pagka-senador, sinuportahan pa siya ni FPRRD, period!

XXX

SA LAKI NG 2026 NATIONAL BUDGET, TIYAK MALAKI RIN UUTANGIN NG MARCOS ADMIN -- Ubod nang laki ang national budget next year na P6.793 trillion.

Sa laki n’yan ay asahan nang lalong lulubog sa utang ang ‘Pinas dahil tiyak na malaki rin ang uutangin ng Marcos administration para mabuo ang 2026 national budget, boom!

XXX

SURVEY NG SWS NA BUMABA ANG BILANG NG MGA PAMILYANG NAGUGUTOM, ‘DI RAMDAM NG MGA MARALITANG PINOY -- Mula sa 20% ay bumaba raw sa 16.1% ang bilang ng mga pamilyang Pinoy na nakakaranas ng gutom.

Sa totoo lang, hindi ramdam ng mga mahihirap ang survey na iyan ng SWS kasi sa panahon ng Marcos admin, maraming maralita pa rin ang nakakaranas ng gutom, period