Sa darating na SY 2022-2023... F2F classes, gawin nang 100% — Kabataan Party-list

ni Zel Fernandez | May 7, 2022

Kasabay ng eleksiyon ay ang nalalapit na ring pagbubukas ng panibagong taong pampaaralan sa mga eskuwelahan sa bansa kaya panawagan ng Kabataan party-list, gawin na umanong 100 porsiyento ang ligtas na pagbubukas ng klase ngayong school year 2022-2023.

Kaugnay ng plano ng Department of Education (DepEd) na dagdagan pa ang mga lalahok na eskuwelahan at year levels sa gaganaping sa face-to-face (F2F) classes sa pagsisimula ng pasukan, isinusulong ng party-list na maisagawa na ito sa lahat ng paaralan sa bansa.

Paliwanag ng Kabataan Party-list, halos lahat ng siyudad at munisipalidad ay nasa ilalim na umano ng Alert Level 1 at mahigit kalahati na ng kabuuang bilang nito ang mayroong limitadong face-to-face classes.

Gayundin, umaasa ang party-list na maisasakatuparan na anila ang regular mass testing sa lahat ng mga school personnel; maging ang paglalaan ng karagdagang pondo para sa mga pasilidad, kagamitan at iba pang logistics na kakailanganin sa ligtas na pagbabalik ng mga mag-aaral sa mga paaralan.