F2F ‘pag suspendido walang online classes — DepEd

ni BRT @News | August 2, 2023

Nilinaw ng Department of Education na hindi na kailangan pang mag-attend ng online classes kung suspendido na ang in-person classes dahil sa masamang lagay ng panahon, alinsunod sa DepEd Order 37.

Ito ang paglilinaw ni DepEd spokesperson Undersecretary Michael Poa matapos na batikusin ng Alliance of Concerned Teachers (ACT) ang desisyon ng ahensya na magsagawa pa rin ng online classes sa gitna ng kalamidad na una nang tinawag ng grupo na hindi makatarungan at insensitibo sa sitwasyon ng mga mag-aaral at kanilang pamilya.

Ani Poa, para hindi magkaroon ng online disruption, isi-switch ang mga mag-aaral sa tinatawag na alternative delivery modes kabilang na ang pagsagot sa modules subalit hindi aniya pipilitin ang mga mag-aaral na tapusin ang mga ito lalo na kapag hindi na nila kaya dahil nga sa epekto ng bagyo dahil prayoridad pa rin ang kapakanan at kaligtasan ng mga guro at mag-aaral.

Pinaalala rin ng DepEd na mayroong awtoridad ang mga pampublikong paaralan na mag-switch o lumipat ng learning modes mula sa on-site classes sa alternative learning methods depende sa assessment sa kanilang sitwasyon.

Matinding init, walang F2F classes — DepEd

ni Madel Moratillo | April 24, 2023

Maaari umanong masuspinde ang face-to-face classes at magsagawa ng modular distance learning dahil sa matinding init ng panahon o kawalan ng kuryente.

Ayon kay Department of Education spokesperson Atty. Michael Poa, sa isang memorandum na inisyu sa mga pampubliko at pribadong paaralan na may petsang Abril 20, nakasaad na pinaalalahanan ang pamunuan ng mga eskwelahan na mayroon silang awtoridad at responsibilidad na magsuspinde ng in-person classes at bumalik sa distance learning kung masama ang panahon o sobrang taas ng temperatura na maaaring makaapekto sa pag-aaral ng mga estudyante at kanilang kalusugan.

Paliwanag ni Poa, magkakaiba ang sitwasyon sa bawat paaralan kaya ang school heads ang mas makakadetermina kung ano ang makakabuti.

Ayon sa PAGASA, pwedeng umabot pa ng 50°C ang heat index sa ibang lugar habang may ilan ang pwede pang abutin ng hanggang 56°C.

Ang Occidental Mindoro ay inilagay naman sa state of calamity dahil sa 20-hour daily power outage sa nakalipas na buwan.

Salig sa DepEd Order 37, walang automatic class suspension dahil sa kawalan ng kuryente pero nasa diskresyon ng pamunuan ng eskwelahan na magkansela ng klase kung makakaapekto ito sa pag-aaral ng mga estudyante.

Sa survey ng Alliance of Concerned Teachers, mayorya umano ng mga guro sa bansa ang nagsabi na maraming estudyante ang hirap na makapag-concentrate sa pag-aaral dahil sa matinding init ng panahon.

100% face-to-face classes sa Nobyembre — P-BBM

ni Lolet Abania | July 5, 2022

Pinag-iisipan na ng Department of Education (DepEd) na simulan ang face-to-face classes sa ilang mga paaralan sa Setyembre bago magsagawa ng 100% in-person schooling sa Nobyembre, ayon kay Pangulong Marcos Jr. ngayong Martes.

Ito ang inanunsiyo ni Pangulong Marcos matapos ang unang Cabinet meeting sa ilalim ng kanyang administrasyon.

“There are some things immediately accessible we can start doing something about it already,” pahayag ni Pangulong Marcos sa isang news briefing matapos ang Cabinet meeting.

“The first thing that is an example of that is Inday Sara’s announcement that we have a plan for full face-to-face by November of this year,” dagdag ng Pangulo, na ang tinutukoy niya ay si Vice President Sara Duterte na DepEd secretary.

Ayon sa Pangulo, ang vaccination laban sa COVID-19 at iba pang mga isyu ang kanilang mauunang tatalakayin para sa planong face-to-face classes sa lahat ng elementary at high schools.

Sinabi na ng DepEd na nasa 38,000 paaralan ang handa na para sa face-to-face classes kapag ang School Year 2022–2023 ay nagsimula sa Agosto.