DepEd, zero budget sa bagong guro

by Mervin Reyes @News | September 9, 2026

Photo: File / DepEd

Walang nakalaang pondo para sa recruitment ng mga bagong guro sa 2027 sa ilalim ng kasalukuyang panukalang budget ng Department of Education (DepEd), kinumpirma ni Education Secretary Sonny Angara sa House Committee on Appropriations nitong Lunes.

Ayon kay Angara, nangangailangan ang DepEd ng 14,274 karagdagang guro na nagkakahalaga ng tinatayang P4.29 bilyon, ngunit walang inilaan para rito sa 2027 National Expenditure Program (NEP).

Kabilang ang halaga sa karagdagang P49.16 bilyon na hinihingi ng DepEd para sa personnel improvement program. 

Umaasa si Angara na maibabalik ang pondo habang nagpapatuloy ang deliberasyon sa pambansang budget.

Sinabi rin niya na nakapag-hire ang DepEd ng 32,000 guro ngayong 2026, mas mataas sa karaniwang 20,000 bagong guro kada taon.

Nasa halos P976 bilyon ang panukalang 2027 budget ng DepEd, ngunit humihingi pa ang kagawaran ng karagdagang P145.19 bilyon para sa mga programang kulang ang pondo sa NEP.

Dahil nasa proseso pa ng pagtalakay sa Kongreso ang 2027 national budget, maaari pang mabago ang alokasyon para sa hiring ng mga bagong guro.

F2F classes, depende sa iskul – DepEd

ni Mylene Alfonso @News | August 20, 2026

Photo: DepEd-SDO / File

Isinusulong ng Department of Education (DepEd) ang mas flexible na pagpapatuloy ng klase sa antas ng paaralan matapos ang sakuna o masamang panahon upang maiwasan ang learning loss.

Ayon kay Palace Press Officer Undersecretary Claire Castro, naiparating na kay Pangulong Ferdinand Marcos Jr. ang naturang panukala at pinag-aralan ito ng DepEd sa pangunguna ni Education Sec. Sonny Angara.

Ipinaliwanag ni Castro na nais ng DepEd na ang desisyon sa pagpapatuloy o pagsususpinde ng klase ay nakabatay sa aktuwal na sitwasyon ng bawat paaralan at komunidad, sa halip na awtomatikong pare-pareho ang suspension sa buong probinsya, lungsod o munisipalidad.

“Ayon sa DepEd, mas gusto po nilang magkaroon ng flexible at nakabase sa actual situation ng bawat school at community, hindi iyong automatic na pare-pareho ang suspension sa buong province, city or municipality – magkakaiba kasi ang geography, risk at conditions sa

bawat lugar,” paliwanag ni Castro sa Palace briefing.

Ani Castro, kung ligtas ang lugar, maaaring ipagpatuloy ang klase, ngunit kung hindi ligtas ay mananatili itong suspendido.

Binigyang-diin din ni Castro na hindi nangangahulugan ang panukala na kanya-kanyang desisyon na ang mga paaralan. Mahalaga aniya ang koordinasyon at shared responsibility kasama ang mga lokal na pamahalaan, gayundin ang malinaw na safety assessment, napapanahong komunikasyon at accountability bago magdesisyon.

Babala ng DepEd sa mga titser: Estudyante, bawal i-content sa socmed

ni Mervin Reyes @News | August 15, 2026

Photo: FIle / DepEd PH

Nagbabala ang Department of Education (DepEd) sa mga guro laban sa paggamit sa kanilang mga estudyante bilang content sa social media nang hindi isinasaalang-alang ang mga patakaran sa privacy at child protection.

Pinaalalahanan ng ahensya ang mga guro na maging maingat sa pagpo-post ng mga larawan, video at iba pang materyal na nagtatampok sa mga mag-aaral, lalo na kung maaaring malagay sa panganib ang kanilang seguridad, dignidad at mga karapatan.

Ayon sa ahensya, ilang insidente ang naitala kung saan ginagamit ng mga guro ang kanilang propesyon sa paggawa ng online content.

Giit ng ahensya, ang pagsasama sa mga estudyante sa ganitong content ay maaaring lumabag sa ethical standards ng DepEd.