Socmed, ginagamit — DepEd... Edad 16 pababa, target ng terorista

ni Mylene Alfonso @News | September 23, 2026

Photo: DepEd / File

Suportado ni Education Secretary Sonny Angara ang ang panukalang higpitan ang paggamit ng social media ng mga batang 15 o 16 taong gulang pababa upang higit na maprotektahan ang mga menor-de-edad sa online na panganib.

Sinabi ni Angara na mas mainam ang regulasyon kaysa sa agarang pagbabawal ng social media, at hinimok ang mga online platform na magpatupad ng mas mahigpit na child protection protocols.

Aniya, ipinapakita ng ilang pag-aaral na ang mga batang 15 hanggang 16 taong gulang pababa ay nangangailangan ng mas mahigpit na proteksiyon habang gumagamit ng social media.

“Ako, baka regulate. I want these apps to be more regulated and child-friendly, [and to be] more stringent in their child protocol,” tugon ni Angara sa isang ambush interview.

“... I think studies show, 15 to 16 [years old] pababa kailangan talaga i-regulate,” patuloy ng kalihim.

Nilinaw din ni Angara na ang usapin ng kabuuang pagbabawal ng social media para sa mga bata ay nasa kapangyarihan ng Kongreso, at hindi ng Department of Education.

Binigyang-diin niya na dumarami ang mga online platform na umano’y ginagamit ng mga groomer at iba pang grupo upang samantalahin o i-recruit ang mga menor de edad, kabilang ang paggamit ng ilang gaming apps para sa mapanganib na layunin.

“We should regulate it, definitely…Really restrict the use and make it difficult kasi, right now, maraming groomers online. They’re supposed to be a gaming app pero talagang ginagamit for recruitment for terrorism, for nihilistic violence groups,” paliwang ni Angara.

“... It’s about time that we put pressure on these apps to become more child-friendly,” hirit niya.

Kasabay nito, patuloy na pinag-uusapan sa Kongreso at iba’t ibang ahensya ng pamahalaan, kabilang ang Department of the Interior and Local Government (DILG), ang mga panukalang magpapalakas ng proteksyon sa mga bata laban sa mapaminsalang online content at mga indibidwal na nagmamanipula sa kabataan.

Ang mga naturang panukalang ay umigting matapos ang mga insidente ng karahasan sa paaralan, kung saan sinasabing isa sa mga tinitingnang salik ng mga awtoridad ang impluwensya ng mapanganib na nilalaman at mga taong nakikisalamuha sa mga bata sa internet. 

DepEd, zero budget sa bagong guro

by Mervin Reyes @News | September 9, 2026

Photo: File / DepEd

Walang nakalaang pondo para sa recruitment ng mga bagong guro sa 2027 sa ilalim ng kasalukuyang panukalang budget ng Department of Education (DepEd), kinumpirma ni Education Secretary Sonny Angara sa House Committee on Appropriations nitong Lunes.

Ayon kay Angara, nangangailangan ang DepEd ng 14,274 karagdagang guro na nagkakahalaga ng tinatayang P4.29 bilyon, ngunit walang inilaan para rito sa 2027 National Expenditure Program (NEP).

Kabilang ang halaga sa karagdagang P49.16 bilyon na hinihingi ng DepEd para sa personnel improvement program. 

Umaasa si Angara na maibabalik ang pondo habang nagpapatuloy ang deliberasyon sa pambansang budget.

Sinabi rin niya na nakapag-hire ang DepEd ng 32,000 guro ngayong 2026, mas mataas sa karaniwang 20,000 bagong guro kada taon.

Nasa halos P976 bilyon ang panukalang 2027 budget ng DepEd, ngunit humihingi pa ang kagawaran ng karagdagang P145.19 bilyon para sa mga programang kulang ang pondo sa NEP.

Dahil nasa proseso pa ng pagtalakay sa Kongreso ang 2027 national budget, maaari pang mabago ang alokasyon para sa hiring ng mga bagong guro.

F2F classes, depende sa iskul – DepEd

ni Mylene Alfonso @News | August 20, 2026

Photo: DepEd-SDO / File

Isinusulong ng Department of Education (DepEd) ang mas flexible na pagpapatuloy ng klase sa antas ng paaralan matapos ang sakuna o masamang panahon upang maiwasan ang learning loss.

Ayon kay Palace Press Officer Undersecretary Claire Castro, naiparating na kay Pangulong Ferdinand Marcos Jr. ang naturang panukala at pinag-aralan ito ng DepEd sa pangunguna ni Education Sec. Sonny Angara.

Ipinaliwanag ni Castro na nais ng DepEd na ang desisyon sa pagpapatuloy o pagsususpinde ng klase ay nakabatay sa aktuwal na sitwasyon ng bawat paaralan at komunidad, sa halip na awtomatikong pare-pareho ang suspension sa buong probinsya, lungsod o munisipalidad.

“Ayon sa DepEd, mas gusto po nilang magkaroon ng flexible at nakabase sa actual situation ng bawat school at community, hindi iyong automatic na pare-pareho ang suspension sa buong province, city or municipality – magkakaiba kasi ang geography, risk at conditions sa

bawat lugar,” paliwanag ni Castro sa Palace briefing.

Ani Castro, kung ligtas ang lugar, maaaring ipagpatuloy ang klase, ngunit kung hindi ligtas ay mananatili itong suspendido.

Binigyang-diin din ni Castro na hindi nangangahulugan ang panukala na kanya-kanyang desisyon na ang mga paaralan. Mahalaga aniya ang koordinasyon at shared responsibility kasama ang mga lokal na pamahalaan, gayundin ang malinaw na safety assessment, napapanahong komunikasyon at accountability bago magdesisyon.