P9.6B para sa pagpapatayo ng mga klasrum — PBBM

ni Mylene Alfonso @News | February 12, 2026

Photo: PBBM / FB

Inanunsyo ni Pangulong Ferdinand R. Marcos Jr. ang paglalaan ng humigit-kumulang P9.6 bilyon para sa pagpapatayo ng 4,000 silid-aralan sa buong bansa na layuning matugunan ang kakulangan sa mga learning spaces at mapabuti ang kalagayan ng edukasyon para sa mga mag-aaral.

Ginawa ni Marcos ang anunsyo sa paglagda ng memorandum of agreement (MOA) sa pagitan ng Department of Education (DepEd) at local government units (LGUs) upang gawing pormal ang partnership para mapabilis ang pagpapatayo ng mga silid-aralan at matugunan ang backlog.

Sa seremonya ng paglagda sa Palasyo, sinabi ng Pangulo na ang pondo ay ilalaan para sa unang yugto ng Nationwide Classroom Construction Program, na ipatutupad sa ilalim ng MOA.

Ayon kay Marcos, makatatanggap ang mga pamahalaang panlalawigan ng P4.1 bilyon para sa pagtatayo ng tinatayang 1,200 silid-aralan habang ang DepEd ay bibili ng humigit-kumulang 2,800 prefabricated classrooms na nagkakahalaga ng mahigit P5 bilyon.

Nangako ang Pangulo na gugugulin niya ang nalalabing bahagi ng kanyang termino sa pagbibigay prayoridad sa sektor ng edukasyon sa pamamagitan ng pagtugon sa kakulangan na 145,000 silid-aralan batay sa tala noong Disyembre 2025.

P20K SRI para sa guro, empleyado ng DepEd, bayaran na nang buo — Rep. Tinio

by Info @News | January 6, 2026

Photo: File / ACT Teachers Partylist

Nanawagan si ACT Teachers Partylist Rep. Antonio Tinio kina Pangulong Ferdinand Marcos, Jr. at Department of Budget and Management (DBM) na ibigay na nang buo ang P20,000 na Service Recognition Incentive (SRI) ng mga guro at empleyado ng Department of Education (DepEd) sa kabila ng patingi-tingi umanong pagbabayad sa nasabing incentives.

“P20,000 po ito dapat pero by installment na binayaran ang mga teachers maximum ay P14,500 lamang po ang natatanggap pa nila kaya may utang po ang national government sa kanila,” ayon kay Tinio.

Dagdag pa niya, “Account payable po ito, so panawagan po natin sa DBM na pabilisin ang proseso ng pagbayad ng nalalabi para makumpleto ang amount na P20,000.”

Iginiit din niya na natanggap na ng ibang government employee ang kumpletong halaga ng incentives ngunit ang mga guro at empleyado ng DepEd ay naghihintay pa rin na makumpleto ang SRI.

Lahat ng kinder, libre pagkain araw-araw — Angara

ni Madel Moratillo @News | July 22, 2025

Photo File: Libreng pagkain sa kinder - DepEd Philippines

Pinalawak na ng Department of Education (DepEd) ang kanilang School-Based Feeding Program.

Dahil d'yan, lahat ng kindergarten sa mga pampublikong paaralan sa bansa ay makakatanggap na ng masustansyang pagkain araw-araw. 

Ang programa ay inilunsad kahapon sa Juan Sumulong Elementary School sa Antipolo City. 

Layon ng programa na magbigay ng hot meals at fortified food products araw-araw sa 3.4 milyong learners kabilang ang lahat ng kindergarten pupils at undernourished na mga bata sa Grade 1 hanggang 6. 

Sabi ni DepEd Secretary Sonny Angara, kapag may sapat na nutrisyon ang mga bata, mas madali silang matuto. 

Sa datos ng DepEd, sa Cagayan Valley (Region II) at Davao (Region XI), bumaba sa 80% ang bilang ng mga undernourished na kindergarten.