Walang lusot — Angara... Babala sa titser na nagbenta ng laptop

ni Mylene Alfonso @News | November 11, 2026

Photo: File / Sec. Sonny Angara - DepEd Philippines

Tiniyak ni Department of Education (DepEd) Secretary Sonny Angara na may mekanismo ang kagawaran upang maiwasan ang pagbebenta ng mga gurong makatatanggap ng MacBook Neo laptops na ipinamamahagi ng pamahalaan.

Ayon kay Angara, maituturing na government property ang mga laptop kaya kailangang bayaran ng sinumang guro na magbebenta nito. 

“Opo, dahil government property ho iyan, kapag binenta ho nila eh di babayaran ho nila iyan,” pahayag ni Angara sa briefing sa Palasyo.

Binanggit din ng kalihim na may itinalagang IT officer sa bawat paaralan na nagsisilbing custodian o tagapangalaga ng mga IT equipment, kabilang ang mga ipinamahaging laptop.

“Well, each school has an IT officer, so, siya iyong parang custodian noong IT equipment sa school,” paliwanag ni Angara.

P15B dagdag-budget para sa titser, tutors at remedial classes — DepEd

ni Mervin Reyes @News | November 6, 2026

Photo: File / DepEd

Humihirit ang Department of Education (DepEd) ng mahigit P15 bilyong karagdagang pondo sa 2027 national budget upang mapalawak ang tutoring at iba pang programa para matulungan ang mga estudyanteng makahabol sa kanilang pag-aaral.

Inihayag ni Education Secretary Sonny Angara ang panawagan matapos ang kanyang pagbisita sa Iloilo City at Bacolod City nitong Miyerkules, alinsunod sa direktiba ni Pangulong Ferdinand Marcos Jr. na bigyang-prayoridad ang pagkatuto sa ilalim ng Academic Recovery and Accessible Learning (ARAL) Program.

Kabilang sa mga programang ipinakita ang paglulunsad ng BIG BOOK materials para sa mga batang Kindergarten hanggang Grade 3, na nagtatampok ng mga prinsipyo ng circular economy upang isulong ang maagang pagkatuto.

Ayon kay Angara, bumaba sa 2.2 milyon ang bilang ng mga estudyanteng nahihirapan sa pag-aaral noong School Year 2025-2026, mula sa dating 6.7 milyon, kasunod ng pagpapatupad ng learning recovery initiatives.

Upang mapanatili ang pag-unlad, gagamitin ang hinihinging pondo para sa honoraria ng mga gurong may dagdag na teaching load, pagsasanay ng tutors, bayad sa external tutors, summer programs at konsultasyon para sa learning remediation.

DepEd, bumili ng 172K MacBook para sa mga guro

ni Mylene Alfonso @News | November 4, 2026

Photo: File / Apple Macbook Neo - Satechi

Bumili ang Department of Education (DepEd) ng 172,654 Apple MacBook Neo laptops para sa mga guro at kawani ng pampublikong paaralan, alinsunod sa direktiba ni Pangulong Ferdinand Marcos Jr.

Ayon kay Education Secretary Sonny Angara, nagkakahalaga ng humigit-kumulang P43,000 ang bawat MacBook Neo, na mas mababa ng P6,900 kumpara sa regular na presyo. May kasama rin itong limang taong warranty, productivity tools at pagsasanay para sa mga gagamit nito.

Nakatakdang ipamahagi ang mga laptop mula Nobyembre 2026 hanggang Marso 2027 sa buong bansa.

Bahagi rin ng programa ang pakikipagtulungan ng DepEd sa Apple para sa Guru XL training program upang higit na mapahusay ang paggamit ng teknolohiya sa pagtuturo ng mga guro.

Ayon naman sa Apple CEO na si John Ternus, ito ang pinakamalaking kontrata ng Apple sa sektor ng edukasyon para sa Mac.