Rematch ni Suarez kay Navarrete itinutulak

by Gerard Arce @Sports News | July 22, 2026

Photo: Bagsak sa first round pa lang si Mexican Avila kay Suarez.

Kasunod ng matagumpay na panalong nakuha ni Olympian at unbeaten pro boxer Charly “The King’s Warrior” Suarez nitong nagdaang weekend upang mapanatiling nakatuon ang landas sa inaantabayanang rematch kontra unified super-featherweight titlist Emanuel “Vaquero” Navarrete ng Mexico – subalit tila ibang landas ang patutunguhan ng naturang laban.

Naglabas ng kahilingan ang kampo ng 37-anyos na 2016 Summer Olympian at mandatory challenger sa pamunuan ng World Boxing Organization (WBO) na sundin ang kanilang naunang direktiba at kautusan na harapin ng WBO at International Boxing Federation (IBF) na si Navarrete upang masimulan ang negosasyon para sa isang rematch.

“By destroying Manuel Avila, Charly Suarez proved once again he is the top contender to Emanuel Navarrete, and we ask the WBO to enforce their order and direct his team to start negotiating for a rematch,” pahayag ni Sampson Lewkowicz. "Thank you to Garry Jonas and ProBoxTV for giving Charly this high-profile opportunity to show his talents and make a strong case for another title shot.”

Madaling tinapos ni Suarez ang dating world champion Manuel “Tino” Avila tungo sa technical knockout nitong weekend upang makuha ang WBO International junior-lightweight title sa ProBoxTV co-main event sa National Orange Show Events Center sa San Bernardino, California sa Estados Unidos.

Sinang-ayunan naman ni head trainer at manager Delfin Boholst ang kagustuhang makakuhang muli ng panibagong laban ang three-time Southeast Asian Games champion matapos mabinbin ang kontrobersyal na matchup noong Mayo 10, 2025 na nauwi sa technical decision pabor sa Mexican boxer, na kinalauna’y napagdesisyunang gawing ‘No Contest’ ng California State Athletic Commission (CSAC) kasunod ng maling desisyon na accidental headbutt ni referee Edward Collantes.

“Charly’s dream is to be world champion, and we feel he deserves another shot at the title,” eksplika ni Boholst. “Avila was a capable opponent, and Charly had no problem with him. We are ready for another shot at the world title.”

Bagaman may inihain ng kautusan ang WBO sa nasabing rematch, tila may lumitaw na bagong puntirya ang kampo ni Navarrete para muling makaiwas kay Suarez, na planong magkaroon ng unification fight kontra World Boxing Council (WBC) titlist O’Shaquie Foster, habang puntiryang itulak ang 2014 Incheon Asian Games silver medalist kontra dating three-division champion Vasiliy Lomachenko.

“Pag-uusapan pa namin. Prayer lang talaga para sa laban. While we are still in negotiation,” saad ni Suarez sa mensahe sa Bulgar Sports kahapon.