Red notice kay Bantag, inilabas na

ni Jeff Tumbado @News | May 12, 2026

Photo:Gen. Bantag - FB

Naglabas na ang International Criminal Police Organization (Interpol) ng red notice laban kay dating Bureau of Corrections (BuCor) Executive Director General Gerald Bantag kaugnay ng umano’y pagkakasangkot nito sa pagpatay sa brodkaster na si Percival “Percy Lapid” Mabasa at sa umano’y middleman na si Cristito “Jun Villamor” Palaña.

Ito ang kinumpirma ni Interior Secretary Jonvic Remulla sa isang pulong balitaan sa Valenzuela City nitong Lunes.

“For the information of everybody, there is already a red notice against Bantag,” ayon kay Remulla.

Ang Interpol red notice ay isang kahilingan sa mga law enforcement agency sa iba’t ibang bansa upang tuntunin at arestuhin ang isang indibidwal habang hinihintay ang extradition o iba pang legal na proseso.

Si Bantag ay nahaharap sa mga kaso kaugnay sa pagpaslang kay Lapid noong Oktubre 3, 2022 sa Las Piñas City.

Si Lapid ay kilalang kritiko ni Bantag sa kanyang online radio program bago siya tambangan at mapatay malapit sa kanyang tahanan.

Noong Oktubre 17, 2022, sumuko sa mga otoridad ang umaming gunman na si Joel Escorial at inilahad na si Palaña, isang inmate sa New Bilibid Prison (NBP), umano ang nag-utos sa kanya na patayin si Mabasa kapalit ng P550,000.

Ilang oras lamang matapos ang press conference ng Philippine National Police (PNP) hinggil sa pag-amin ni Escorial, natagpuang patay si Palaña sa loob ng Bilibid Prison.