Presyo ng bilihin, nasasakal na ang mamamayan

by Info @Editorial | October 17, 2026

Hindi na nakapagtataka na inflation o patuloy na pagtaas ng presyo ng mga bilihin ang pangunahing inaalala ng mga Pilipino, batay sa isang survey. 

Sa araw-araw na pamimili, ramdam ng bawat pamilya ang bigat ng mahal na pagkain, pamasahe, kuryente at iba pang pangunahing pangangailangan.

Sa kabila ng pagsisikap ng mga manggagawa na pagkasyahin ang kanilang kinikita, patuloy namang nababawasan ang halaga ng kanilang pera. 

Higit na apektado rito ang mga pamilyang mababa ang kita na kailangang mamili kung alin sa kanilang mga pangangailangan ang uunahin.

Hindi sapat na sabihing normal na bahagi ng ekonomiya ang pagtaas ng presyo. Tungkulin ng pamahalaan na tiyaking hindi lubhang mabibigatan ang taumbayan sa gastusin at may sapat na proteksiyon ang mga pinakaapektadong sektor.

Kasabay nito, mahalagang magkaroon ng sapat na trabaho at sahod na naaayon sa patuloy na pagtaas ng gastusin.