Imbestigasyong may pamumulitika, sablay!

by Info @Editorial | October 15, 2026

Kapag pulitika ang nangingibabaw sa imbestigasyon, tila nauuna ang paghatol bago ang ebidensya. Sa halip na hanapin ang katotohanan, nagiging sandata ang mga alegasyon upang sirain ang reputasyon.

Dapat imbestigahan ang anomalya sa pampublikong pondo. Ngunit magkaiba ang pagkukulang sa dokumento, paglabag sa regulasyon, at katiwalian. Hindi maaaring pag-isahin ang mga ito nang walang matibay na patunay.

Tila ganito umano ang kontrobersya sa pagkuwestiyon ni Sen. Ping Lacson sa mga proyekto sa Taguig na iniuugnay kay Sen. Alan Peter Cayetano, mula sa umano’y ghost projects hanggang sa ilegal na reclamation at kuwestiyonableng titulo ng lupa.

Sa pagdinig noong Setyembre 25, sinabi ni DPWH Sec. Vince Dizon na walang natukoy na ghost project sa Taguig, habang iniulat ni Usec. Ricardo Bernabe III na may aktuwal na accomplishment ang 107 proyekto. Ang iregularidad sa dokumento ay hindi awtomatikong patunay ng katiwalian.

Dapat pantay ang pamantayan ng imbestigasyon. Ang tunay na hustisya ay sumusunod sa ebidensya, hindi sa pulitika o sa konklusyong nais patunayan.

Sa kabilang banda, sinumang nasasangkot sa korupsiyon at napatunayang guilty, dapat managot at patawan ng mas mabigat na parusa. Sawa na ang taumbayan sa ingay sa pulitika, hirap na ang bayan sa iba’t ibang krisis, tama na.