Plunder vs. ES Recto

ni Jeff Tumbado @News | May 26, 2026

Photo: Ralph Recto - FB

Naghain ng kasong plunder at malversation nitong Lunes sa Office of the Ombudsman laban kay Executive Secretary Ralph Recto at iba pang government officials dahil umano sa sabwatan para mailipat ang reserve funds ng mga Government-Owned and Controlled Corporations (GOCCs) patungo sa national treasury.

Ayon sa reklamo, noong kalihim pa si Recto ng Department of Finance (DOF), iniutos umano nito ang pag-transfer sa hindi nagamit na pondo ng Philippine Health Insurance Corporation (PhilHealth) na nagkakahalaga ng P60 bilyon, at P107 bilyon mula sa Philippine Deposit Insurance Corporation (PDIC), alinsunod sa special provision ng 2024 national budget.

Personal na naghain ng reklamo si Dr. Tony Leachon sa anti-graft body laban kina Recto at Health Secretary Teodoro Herbosa, chairman ng board of directors ng PhilHealth; acting DOF chief Frederick Go; dating acting secretary ng Department of Budget and Management (DBM) na si Rolando Toledo; dating PhilHealth CEO Emmanuel Ledesma Jr.; PDIC CEO Roberto Tan; at iba pang opisyal ng PDIC na tinukoy bilang John at Jane Does.

Sinabi ni Leachon na nilabag umano ni Recto ang Konstitusyon at isinantabi ang karapatan ng mamamayan sa kalusugan sa paglipat ng P60 bilyong pondo ng PhilHealth.

Una nang iniutos ng Supreme Court ang pagbabalik ng P60 bilyon sa PhilHealth.

Para naman sa PDIC funds, sinabi naman ni Bangko Sentral ng Pilipinas (BSP) Governor Eli Remolona Jr. na pinag-aaralan na nila ang mga opsyon upang mabawi ang P107.23 bilyong inilipat sa national treasury.