Philippine Heart Center Annex sa Clark Freeport Zone, oks

ni Mylene Alfonso | March 11, 2023

Ipinag-utos ni Pangulong Ferdinand R. Marcos Jr. ang pagtatatag ng Philippine Heart Center (PHC) Annex sa Clark Freeport Zone sa Pampanga upang mailapit ang kalidad ng healthcare sa mga Pilipino lalo na ang mga may cardiovascular diseases.

Nakasaad sa Executive Order No. 19, na nilagdaan ng Pangulo na may petsang Marso 8, karamihan sa mga Pilipino na dumaranas ng cardiovascular disease ay kailangang pang magtungo sa PHC na nasa Metro Manila.

“With world-class highways and an international airport, the Clark Freeport Zone is a gateway to Central Luzon. As such, establishing a specialty hospital annex in Clark Freeport Zone will bring quality healthcare closer to the people,” nakasaad pa sa EO.

Ang PHC na itinatag sa ilalim ng Presidential Decree No. 673 (s. 1975), ay ang tanging ospital sa Pilipinas na nagbibigay ng specialized medical services sa mga Pilipinong dumaranas ng cardiovascular diseases.

Base pa sa kautusan, ang karagdagang pondo ay maaaring kunin sa mga kasunduan na puwedeng pasukin ng PHC sa iba pang ahensya ng gobyerno para sa layunin ng pagtatatag at pagpapatakbo ng PHC Clark.