Pet cremation facility, iniimbestigahan... 29 patay na aso at pusa, itinapon sa bakanteng lote

by Mervin Reyes @News | November 1, 2026

Photo: Ang mga labi ng mga aso at pusa na itinapon sa bakanteng lote sa Bulacan - Luna & Furry Siblings

Natagpuan ang mga labi ng 26 aso at tatlong pusa na nakalagay sa magkakahiwalay na supot at itinapon sa isang bakanteng lote sa San Jose del Monte City, Bulacan.

Ayon sa isang animal welfare group sa social media, may mga supot na may nakasulat na pangalan at timbang ng mga alagang hayop, kaya pinaghihinalaang maaaring hindi maayos na itinapon ng isang pet aftercare provider ang kanilang mga labi.

Bilang bahagi ng imbestigasyon, pinuntahan ng grupo ang anim na veterinary clinic at dalawang pet cremation facility upang makakuha ng mga posibleng impormasyon.

Sa tulong ng PetMed Animal Clinic, isinailalim din sa microchip scanning ang mga natagpuang labi, ngunit walang nakitang microchip.

Kabilang sa mga pangalang nakasulat sa mga supot ang Sakura, Brandon, Akira, Chelsea, Lucky at Ira.

Nanawagan ang grupo sa mga pet owner na kamakailan lamang gumamit ng veterinary, euthanasia o cremation services na tingnan ang kanilang mga rekord at resibo upang malaman kung may tumutugma sa mga natagpuang labi.

Sa ngayon, hindi pa natutukoy ng mga awtoridad kung sino ang responsable sa pagtatapon ng mga bangkay ng mga hayop.