Pera, alahas ng amo tinangay, 18-anyos na maid, timbog

ni Janice Baricuatro @News | September 23, 2026

Photo: File

Tinatayang nasa kalahating milyong pisong halaga ng pera, alahas at iba pang gamit ang natangay umano ng isang 18-anyos na kasambahay at kasabwat nito sa Brgy. Banaba Cerca, Indang, Cavite, kamakalawa ng gabi.

Arestado ang kasambahay na si alyas Leah matapos i-report ng kanyang amo na si alyas Henry, 62, sa barangay ang insidente.

Batay sa CCTV, naiwan ang suspek at ang ina ng biktima na 82-anyos at doon pumasok si Leah sa kuwarto ng kanyang amo at kinuha ang mga gamit sa drawer ng cabinet.

Bago nito, nakita rin siyang may kausap sa cellphone. Inilagay niya sa paper bag ang mga ninakaw bago dumating ang isang lalaking nakamotorsiklo na pinag-abutan niya nito. 

May isa pang paper bag na nakita sa gilid ng bahay na naglalaman din umano ng pera, alahas at iba pang gamit.

Nakakulong at nahaharap sa kaukulang mga kaso si Leah, habang pinaghahanap pa ang kanyang kasabwat.