Para 'di puro hilata at tutok sa gadgets... Mga aktibidad na oks subukan tuwing kasama ang pamilya

ni Nympha Miano-Ang - @Life and Style | January 24, 2021

Ang paglalaan ng oras kasama ng pamilya lalo na ngayong araw ng Linggo ay nakatutulong upang tumatag ang relasyon habang kapwa nae-enjoy ang mga masasayang sandali ng buong pamilya kahit limitado lamang kayo sa walo para makaiwas sa pandemya. Kung hindi n’yo pa alam kung ano ang nakae-enjoy na bagay na gagawin sa araw ng pamilya na ito, heto ang ilang nakatutuwang family time activities.

1. Magtakda ng espesipikong oras para sa pamilya, puwedeng ngayong araw ng Linggo. Markahan ang petsa at oras sa kalendaryo at gawin itong prayoridad.

2. Pagpasyahan kung anong aktibidad ang gustong gawin kasama ng buong pamilya. Puwedeng games, kung iyon ang inyong balak gawin. Isa pang aktibidad ng pamilya ay puwedeng magkakasabay na panonood ng pelikula.

3. Ang pagbi-videoke ay magandang estilo at nauuso ngayon na pinagkakatuwaan ng buong pamilya.

4. Dahil mahirap pang maglalabas kahit gustung-gusto ninyo ng sports outing, kahit diyan na lang sa bakuran maglagay ng pingpong table, bilyaran o kaya ay mag-badminton o mag-basketball. Planuhin ang panonood ng NBA at magpustahan o kaya ay sumali sa mga nauuso ngayong virtual fun run. Puwede ring magbisikleta na puwedeng sama-samang gawin ng buong pamilya.

5. Mag-camping o mag-hiking sa hindi mataong lugar. Ang parehong aktibidad ay hindi mahal at nagkakaroon pa ng matatag na family bonding.

6. Mag-bake o magluto ng sabay. Ang pagbabahagi ng oras na magkakatulong sa pagluluto sa kusina ay hindi lamang para mapatatag ang pagsasama pero nagtuturo rin ng magandang kakayahan. Magplano ng masarap na tanghalian at meryenda na pagsasaluhan.

Para naman sa mas masayang fun night ng pamilya kung walang oras sa maghapon. Puwede ring magkaroon ng Family Fun Nights lalo na kung Sabado ng gabi o Biyernes ng gabi tuwing weekend. Lahat kayo sa pamilya ay magkakasama at magkakasayahan. Mainam ang maglaro ng scrabble, chess o badminton ang bawat isa. Heto ang ilang tips para maiskedyul ang fun nights ninyo ng pamilya at magkaroon ng weekly variety family activities.

1. Tingnan kung kumpleto ang bawat sa araw ng inyong fun nights. Tandaan, lahat dapat naroon at walang absent.

2. Alamin kung sinu-sino ang dadalo, sabihin na sa bawat isa ang petsa at oras ng fun night. Puwede kayong gumawan ng isang cute at malikhaing imbitasyon para maibigay sa kapamilya na gustong maka-bonding na piling-pili lamang at limitado lamang sa lima hanggang walo.

3. Pumili ng isang maluwag, maaliwalas na walang gaanong ibang tao, maganda at komportableng lugar para sa lahat. Kung may videoke ay mas mainam para mas exciting ang lahat.

4. Ngayon ang pinakamahalagang hakbang, pumili ng aktibidad. Puwedeng board games, pelikula, game of pool, isang video game tournament, mga anak versus magulang, kahit na ang pinakasimpleng game ay maaari nang ma-enjoy.

5. Huwag kalimutan ang meryenda. Maaaring maghanda ng pansit, burger, pizza, popcorn, chips, juice etc.

6. Kapag tapos na kayo sa isang aktibidad, muli kayong magtakda ng petsa para sa isa pa muling family fun night.

7. Magkaroon ng tamang games para sa edad. Nababagot ang teenager sa millionaires games, dahil uso na ngayon ang mobile legends, habang hindi naman mae-enjoy ng paslit ang panonood sa kuya nilang naglalaro ng ML o playstation. Kung sinuman sa pamilya ang gusto ng board games at plano ninyong maglaro, bumuo ng team na gustong laruin ito.

8. Maghanda ng espesyal na pagkain para sa party. Puwedeng fried chicken, pansit, spaghetti, chips, ice cream o cake na mae-enjoy ng lahat.

9. Huwag namang masyadong mahaba ang fun night. Baka sobra kayong mapagod sa susunod na araw.

10. Magsaya nang husto.