Pangakong taas-sahod, napako na naman

by Info @Editorial | August 1, 2026

Naudlot na naman ang pag-asa ng mga manggagawa sa Metro Manila. Sa halip na maramdaman ang bahagi ng dagdag na P85 sa arawang sahod, pansamantala itong nahinto dahil sa utos ng hukuman. 

Ang dagdag-sahod ay hindi luho kundi bahagyang ginhawa lamang sa gitna ng patuloy na pagtaas ng gastos. 

Kung may agam-agam sa taas-sahod, dapat itong maresolba nang mabilis at patas.

May karapatan ang mga negosyo na ipaglaban ang kanilang panig, lalo na kung naniniwala silang maaapektuhan ang kanilang operasyon. Ngunit hindi rin dapat kalimutan na ang pundasyon ng anumang negosyo ay ang lakas-paggawa. 

Kung ang mga manggagawa ay patuloy na mababa ang sahod habang mataas ang presyo ng bilihin, lalong hihina ang kanilang kakayahang bumili at gumastos—isang sitwasyong hindi rin makabubuti sa ekonomiya.

Ang tunay na hamon ngayon ay kung paano maibabalanse ang interes ng mga negosyo at ng mga manggagawa nang hindi isinasakripisyo ang kapakanan ng nakararami. 

Habang hinihintay ang pinal na desisyon ng hukuman, ang mga manggagawang Pilipino ay patuloy na umaasang hindi na muling paaasahin sa matagal nang hinihintay na dagdag-suweldo.