Pambawi sa pramis ni PBBM na libreng tax sa P350K annual income... Dagdag-buwis sa mga produkto

ni Mervin Reyes @News | July 29, 2026

Photo: File

Pinag-aaralan ng Kamara ang pagtataas ng buwis sa vape, sweetened beverages, single-use plastic at iba pang piling produkto upang mabawi ang tinatayang P50 bilyong mawawalang kita ng pamahalaan kapag naisabatas ang panukalang alisin ang income tax ng mga empleyadong kumikita ng hanggang P350,000 kada taon.

Ang hakbang ay bahagi ng mga isinusulong na paraan upang matiyak na may sapat na mapagkukunan ng pondo ang gobyerno habang ipinatutupad ang isa sa mga pangunahing pangakong inihayag ni Pangulong Ferdinand Marcos Jr. sa kanyang ikalimang State of the Nation Address (SONA).

Kasalukuyang pinag-aaralan ng Kamara ang balanse sa pagitan ng pagbibigay ng tax relief sa mga manggagawa at pagtiyak na hindi maaapektuhan ang kakayahan ng pamahalaan na pondohan ang mahahalagang programa at serbisyo para sa publiko.