Pamamasyal sa disyerto, pahiwatig ng kamalasan sa paglalakbay

ni Estrellia de Luna @Panaginip gabay ng buhay | March 14, 2023

Analisahin natin ang panaginip na ipinadala ni Danilo ng Masbate.

Dear Maestra,

Dati akong nagtatrabaho sa Saudi at palagi kaming pumupunta sa disyerto. Nalilibang kami sa mga camel du’n. Gayunman, ngayon ay nandito ako sa Pilipinas at halos araw-araw akong nananaginip ng mga camel. Namasyal ako sa disyerto, tapos may dalawang kamelyo ru’n, ‘yung isa ay may dalawang humps, habang ‘yung isa naman ay isa lang ang hump.

Ano ang ibig sabihin ng panaginip ko?

Naghihintay,

Danilo

Sa iyo, Danilo,

Ang ibig sabihin ng panaginip mo na namasyal ka sa disyerto ay makakapaglakbay kang muli sa ibang bansa, subalit makakaranas ka ng kamalasan sa iyong paglalakbay.

Maraming sagabal ang iyong haharapin bago mo marating ang bansang pupuntahan mo.

Samantala, ang camel na may dalawang humps ay nangangahulugang maraming kabiguan ang mararanasan mo sa unang bahagi ng iyong buhay, subalit malalagpasan mo ito kung magiging matapang ka at buo ang loob na sumagupa sa anumang hamon ng buhay. Gayunman, sa bandang huli, pagpapalain at sasagana ka sa buhay.

Ang camel na may isang hump ay halos ganundin ang kahulugan. Nagpapahiwatig ito ng mga hadlang o sagabal na maaari mong danasin sa araw-araw mong pamumuhay.

Matapat na sumasaiyo,

Maestra Estrellia de Luna