ni Mylene Alfonso | December 30, 2021
Nakatakdang lagdaan ngayong araw, Disyembre 30, ni Pangulong Rodrigo Duterte ang
proposed P5.024-trillion General Appropriations Act (GAA) para sa taong 2022.
Ito ang inihayag ni Cabinet Secretary Karlo Nograles alinsunod na rin sa una nang ipinangako ng Palasyo na hindi matatapos ang taong kasalukuyan nang hindi napipirmahan ng Pangulo ang pambansang pondo.
“Inaasahan natin na tomorrow, naka-schedule po ang pagpirma ni Pangulong
Rodrigo Roa Duterte ng 2022 General Appropriations Law,” ani Nograles.
“As promised, the President will sign this very important measure na hindi pa sasapit ang Dec. 31,” sabi pa ni Nograles.
Matatandaang binigyang-diin ng Palasyo, na malaking papel ang gagampanan ng 2022 budget sa nagpapatuloy na pagtugon ng pamahalaan sa COVID-19 pandemic.
Sa pinal na bersyong ipinasa ng Kongreso, P50 bilyon dito ang inilaan para sa COVID-19 vaccines, habang P22.99 bilyon naman para sa pagpapaigting ng health facilities.
Una na ring tiniyak ng kalihim, na pinag-aralang mabuti at dumaan sa proseso ang badyet bago lagdaan ng Punong Ehekutibo.