P-BBM, humirit ng mas malaking budget sa 2024, alam na!

ni Pablo Hernandez III @Prangkahan | June 26, 2023

HINDI NARAMDAMAN NG MAMAMAYAN ANG P5.2 TRILLION 2023 NATIONAL BUDGET NG MARCOS ADMIN -- Higit P5.7 trillion ang hinihingi ngayon ni Pres. Bongbong Marcos (P-BBM) sa Senado at Kongreso para sa 2024 national budget ng kanyang administrasyon.

Matatandaan, last year para sa 2023 national budget ay higit P5.2 trillion ang hiningi ni P-BBM na inaprubahan ng mga senador at kongresista.

Sana, ang P5.7-T na hirit ni P-BBM para sa national budget next year (2024) ay maramdaman na ng mamamayan kasi sa totoo lang, ‘yung P5.2-T national budget ngayong 2023, ay hindi naramdaman ng sambayanan kung saan napunta, period!

◘◘◘

DAHIL SA LAKI NG HINIHINGING NATIONAL BUDGET NG MARCOS ADMIN, ASAHAN NANG LALAKI RIN ANG CONFIDENTIAL FUND NINA P-BBM AT VP SARA -- Ang confidential fund ni P-BBM last year (2023) ay P4.5 billion, samantalang umabot naman sa P650 million ang confidential fund ni Vice President at Department of Education (DepEd) Sec. Sara Duterte-Carpio.

At dahil mas malaki ang hinihinging national budget ng Marcos administration para sa year 2024, ay asahan nang lalaki rin ang hihinging confidential fund nina P-BBM at VP Sara, boom!

◘◘◘

PORK BARREL NG MGA PRO-MARCOS SEN. AT CONG. ASAHANG MAGLALAKIHAN DIN SA YEAR 2024 -- Hindi lang confidential fund nina P-BBM at VP Sara ang tiyak na lalaki next year, kundi pati pork barrel ng mga pro-Marcos senators at congressmen.

Tiyak kasing hindi papayag ang mga senador at kongresista na malaki ang confidential funds nina P-BBM at VP Sara, tapos ang kanilang mga pork barrel ay maliit lang.

Dahil d’yan, asahan na rin na maglalakihan ang magiging pork barrel funds ng mga pro-Marcos senator at congressman next year, buset!

◘◘◘

SA LAKI NG INIWANG UTANG NI EX-P-DUTERTE, TAPOS UTANG DIN NANG UTANG SI P-BBM, EXPECTED NEXT YEAR MAS TATAAS PA ANG PRESYO NG MGA BILIHIN AT BAYARIN -- Ang kalahati ng national budget na hihingin ni P-BBM ay magmumula sa uutangin sa iba’t ibang financial institution sa mundo, kasi hindi naman kaya ng pamahalaan na makalikom ng tax sa mamamayan na aabot ng P5.7-T.

Dahil sa laki ng iniwang utang ni ex-P-Duterte, tapos palaki na rin nang palaki ang inuutang ni P-BBM para sa yearly national budget ng kanyang administrasyon, eh, asahan na rin na mas tataas pa ang presyo ng mga bilihin at bayarin ng mga mamamayan next year, boom!