Ochoa, naka-gold sa IBJJF Jiujitsu C'ships sa Nevada

ni GA - @Sports | July 2, 2022

Bumalibag ng gintong medalya si 2019 World Brazilian Jiu-Jitsu champion Margarita “Meggie” Ochoa sa American National IBJJF Jiu-Jitsu Championships sa Las Vegas Convention Center sa Las Vegas, Nevada sa U.S.

Dinaig ng 32-anyos na two-time Southeast Asian Games gold medalist ang ka-teammate na si American Faye Lynn Cherrier ng Atos Jiu-Jitsu sa women’s adult brown belt category sa bisa ng 6-2 iskor sa finals upang makapag-uwi ng panibagong karangalan sa bansa.

Nakarating si Ochoa sa Finals nang talunin sa preliminaries si Stephanie Souza Penido ng Gracie Barra via 13-0, habang ni Cherrier si Jazmin Hamuy ng Manzur Bros. Nagwagi ng bronze medals sina Penido at Hamuy.

Nasundan ng under-45kgs 2017 Asian Indoor Martial Arts Games champion ang magkasunod na nakuhang silver medal finish sa IBJJF World Jiu-Jitsu Championships sa The Walter Pyramid sa Long Beach, California nung Hunyo 1-5 sa parehong kategorya at ang 2022 Pan American IBJJF Championship sa Silver Spur Arena sa Kissimmee, Florida noong Abril bago ganapin ang 2021 SEA Games sa Hanoi, Vietnam.

Dinomina rin ng 2018 Jakarta-Palembang Asian Games bronze medalist ang women’s under-48kgs nang talunin sa round robin sina Kanjutha Phattaraboonsorn ng Thailand at Khoon Yin Bless Yeap ng Malaysia, habang tumapos sa silver medal si Minh Duong Thi Thanh ng Vietnam sa nagdaang Hanoi meet.