Niyayaya nang magpakasal ng gf, super-bagets pa para mag-asawa

ni Maestro Honorio Ong - @Kapalaran ayon sa Numero| March 30, 2021

Dear Maestro,

Kasalukuyan pa akong nag-aaral. Ang problema, may girlfriend ako at niyayaya na niya akong magpakasal dahil madalas nang may nangyayari sa amin. Nais kong malaman kung sa panahon ngayon, dapat na ba akong mag-asawa at kung mag-aasawa na ako, aasenso rin ba ang buhay ko kapag ako ay may pamilya na? September 9, 2001 ang birthday ko.

Umaasa,

Ted ng Paltao, Pulilan, Bulacan

Dear Ted,

Alam mo, noong nag-asawa ko, hindi ko itinanong sa Inang Talia ko at maging si Tatang Sucing ko kung dapat na ba akong mag-asawa. Hindi ko rin ito itinanong sa mga kamag-anak, kaibigan at maging sa mga kapitbahay namin.

Sa halip, nagpasya akong mag-isa na mag-aasawa na ako. Nang panahong ‘yun, madalas na nakakaramdam na ako ng kalungkutan at pag-iisa sa tahimik na silid ko sa itaas ng bahay namin, lalo na pagsapit ng gabi at wala akong makausap. Ang masaklap, kahit nakakasama ko sa aking silid ang alaga kong pusa na si Mingming, hindi naman siya nagsasalita, ngiyaw lang nang ngiyaw at parating naghahanap ng daga.

Ibig sabihin sa tanong na, “Dapat na ba akong mag-asawa?” Isa lang ang sagot, at ‘yun ay hindi si Maestro Honorio Ong ang dapat mong tanungin, bagkus ang dapat mong tanungin ay ang iyong sarili.

Dahil personal na bagay sa buhay ng isang lalaki ang pag-aasawa, kaya hindi ito dapat isalalay sa desisyon ng ibang tao. Sa halip, mamayang gabi, bago ka matulog, humarap ka sa salamin at tanungin mo ang iyong sarili kung dapat ka na nga bang mag-asawa?

Anuman ang tugon ng munting tinig sa loob ng iyong kalooban, ‘yun ang sundin mo. Sa ganyang paraan, sa pag-aasawa, dahil ikaw mismo ang nagdesisyon at nagpasya, siguradong higit kang magiging matagumpay at maligaya.

Pero malamang, mamayang gabi kapag tinanong mo na ang iyong sarili, siguradong “hindi” ang isasagot mo.

Alam mo kung bakit? Sa edad mong 19, tunay ngang hindi ka pa pang-asawa. Dahil dito, malamang na ang unconscious self mo ang siguradong tututol, kaya ang isasagot niya ay “hindi,” na nangangahulugang hindi ka pa dapat mag-asawa dahil batid niyang marami ka pang dapat gawin bilang isang nagbibinatang lalaki.

Tandaang tulad ng sinasabi sa aklat ng Ecclesiastes, na tinatawag ding aklat ng Mangangaral sa Bible, na sinulat ni Haring Solomon, may takdang panahon sa lahat ng bagay sa silong ng langit, “For everything there is a season, and a time for every purpose under the heavens.” (Ecclesiastes 3:1-1)

Kapag nagkamali ka ng “timing” sa bawat panukala na iyong gagawin, malamang na mabigo ka lamang. Ngunit kung tama ka ng pag-e-execute ng isang mahalagang aktibidades sa iyong buhay, sa tamang pagkakataon at panahon, mas malaki ang tsansang magtatagumpay ka at mas magiging mabunga ang anumang gawaing ipinatupad sa tama at eksaktong panahon.

Halimbawa, kung mag-aani ka ng palay, ‘wag mong itatapat sa tag-ulan dahil mababasa lamang ang palay mo at mabubulok.

Ganundin sa pag-aasawa at pagtatayo ng pamilya, kung ang panahong ito sa buhay mo ay para sa pag-aaral at pagbuo ng career, bakit mo naman sasabayan ng pag-aasawa?

Kapag ginawa mo ‘yan, nagsisimula ka pa lang, parang palpak at may mali na agad dahil ginawa mo ang isang bagay na hindi naman naaayon sa kanyang eksaktong kapanahunan.

Tandaang kapag ginawa mo ang isang bagay na eksakto sa timing, nasa 98% ka na agad na ikaw ay magtatagumpay at magiging maligaya.

Ganundin sa pagtatayo ng pamilya, bago mo ito gawin, lalo na kung ikaw ay isang lalaki na magiging head of the family balang-araw, kailangang bago mo ito itayo, dapat ay may stable job ka na, matured ang isip at damdamin mo at pagkatapos ay nasa suwerteng taon at mapalad na buwan mo sisimulan ang pagtatayo ng sariling pamilya.

Sa ganu’ng paraan, “proper timing” o nasa tamang panahon ang pag-aasawa, 100% magtatagumpay ka at habambuhay na magiging maligaya.

Habang, ayon sa iyong Love Calendar, Ted, ang tamang panahon ng pag-aasawa ay sa taong 2029. Sa panahong tinuran o sa edad mong 28 pataas, tiyak ang magaganap – ang nasabing pag-aasawa na itinugma sa tamang panahon ay tiyak na mamumunga ng isang maunlad, successful at maligayang pagpapamilya habambuhay.