‘Neutral ako’… Pangulong Duterte hindi mag-eendorso ng kandidato sa pagkapangulo

ni Jasmin Joy Evangelista | April 1, 2022

Inanunsiyo ni Pangulong Rodrigo Duterte na wala siyang ieendorsong presidential candidate sa May 9 elections sa kabila ng panawagan ng mga kaalyado nito na suportahan si Bongbong Marcos.

“I’m not supporting any presidential candidate. Neutral ako. This is not a campaign because I’m not campaigning for any particular candidate. Stop ***** with me kasi hindi ito politika,” aniya sa kanyang speech sa Jpark Island Resort & Waterpark kung saan siya ay dumalo sa joint meeting kasama ang National Task Force to End Local Communist Armed Conflict’s (NTF-ELCAC’s) at ang Regional Task Force (RTF) Central Visayas.

“Syempre, nandito ako nagmamagandang loob. Lahat nang tumakbo sa election, sana manalo sila. Bawal ko sabihin na iboto nyo ito. (Of course, I’m here to be magnanimous. All who are running in the elections, I hope they all win. I’m just not allowed to campaign for someone),” dagdag niya.

Ang Partido Demokratiko Pilipino-Lakas ng Bayan (PDP-Laban) faction ay inendorso na ang presidential candidacy ni Ferdinand “Bongbong” Marcos Jr. para sa May 9 polls.

Matapos ang meeting sa JPark, naka-schedule naming dumalo ang pangulo sa campaign sortie ng PDP-Laban candidates sa Lapu-Lapu City.