Indikasyon na ibang guy ang makakatuluyan kahit inlab pa rin sa ex na pamilyado
ni Maestro Honorio Ong - @Kapalaran ayon sa Palad| February 27, 2021
KATANUNGAN
Nang mag-reunion kaming magkaka-klase, nagkita kami ng ex-boyfriend ko noong high school.
Nagtataka ako kung bakit ang tagal-tagal na ng panahon na ‘yun, may asawa at pamilya na siya, gayundin, medyo tumanda na siya at hindi na kasing guwapo noon, pero kinikilig pa rin ako kapag tinutukso kami ng mga kaklase namin.
Hanggang sa nagkuwentuhan na ng buhay at bago umuwi, masaya ako na nakasama ko siya hanggang hiningi niya ang number ko. Sa madaling salita, naging magka-close ulit kami sa text at Facebook hanggang sa magawa naming mag-date nang palihim at may nangyari sa amin.
Ang tanong ko ay kung siya na ba ang lalaking makakasama ko habambuhay kahit na ngayon ay may asawa na siya, pero sabi niya ay magulo ang kanilang relasyon dahil nasa abroad daw ang misis niya?
Hanggang ngayon, ako ay dalaga pa rin. Sa palagay n’yo, Maestro, kami ba ang itinakda sa isa’t isa kaya kami ay nagkita at nagkaroon ulit ng masayang karanasan?
At kung hindi naman kami ang magkakatuluyan, may darating pa bang ibang lalaki sa buhay ko kahit medyo may edad na ako ngayon?
KASAGUTAN
Sa totoo lang, nagkaroon kayo ng masayang ugnayan ng ex-boyfriend mo noong high school dahil may landi pa rin kayo sa isa’t isa hanggang ngayon kung saan alam mo nang may asawa at pamilya na ‘yung tao ay pumatol ka pa.
Huwag ka nang umasa, Mystery Girl, dahil hindi kayo ang magkakatuluyan ng ex mo kahit sabihin pang muling nabuhay ang relasyon n’yo at may nangyayari pa sa inyo ngayon.
Ito ang nais sabihin ng Guhit ng Kabiguan na makikita sa naputol at nagkabilog na Heart Line (Drawing A. at B. h-h arrow a.) sa kaliwa at kanan mong palad.
Ito ay tanda na ibang lalaki ang mapapangasawa mo at ang lalaking ito ay hindi mo masyadong mahal, pero gawa ng hindi inaasahang pagkakataon at sitwasyon, dahil medyo may edad ka na ngayon at dapat nang mag-asawa, ang lalaking hindi mo na masyadong mahal ang magbibigay sa iyo ng anak hanggang sa makabuo kayo ng maayos na pamilya pero hindi ka gaanong maligaya.
Nangyaring ganu’n dahil kahit dumating ang panahon na may pamilya ka na, hindi maiiwasang palagi mo pa ring maiisip, babalikan ang nausyaming relasyon n’yo ng ex-boyfriend mo, pero ang mga pagniniig n’yo na naganap ay magiging bahagi na lamang ng iyong masayang mga alaala ng nakalipas.
MGA DAPAT GAWIN
Tandaang kung minsan, hindi ang mismong tao ang sumusulat ng istorya ng kanyang kapalaran dahil kung talagang ikaw ang sumusulat at gumagawa ng sarili mong kapalaran, dapat ang gagawin mong ending ay masaya.
Pero dahil hindi ikaw ang “sumusulat ng sarili mong kapalaran”, bagkus ay nakasulat na ‘yan sa mga guhit ng iyong palad, kahit ikaw, hindi mo tuloy alam kung paano tatapusin ang istorya ng iyong buhay.
Oo, hindi mo alam kung paano tatapusin ang kuwento ng iyong buhay na ikaw din ang may gawa, kung masaya o malungkot ba ang magiging katapusan nito, hindi ba’t kahit ikaw ay hindi mo rin alam?
Habang, ayon sa iyong mga datos, Mystery Girl, hindi ang ex-boyfriend mo ang iyong makakatuluyan kahit may lihim kayong ugnayan ngayon. Ito ay dahil pagpasok ng buwan ng Marso hanggang Abril, tuluyan nang matutuldukan ang inyong lihim na relasyon at ito ay mangyayari sa sandaling bumalik sa bansa ang legal wife ng ex-BF mo.
Kasabay ng mga pangyayaring nabanggit, medyo “laylo” na ang inyong relasyon, tuluyan na rin kayong tatabangan hanggang sa unti-unti mo na ring matanggap ang katotohanang hindi nga kayo ang itinakda. Sa halip, dumaan lang kayo sa isang yugto ng maikling romansa ng buhay upang pasarapin at paligayahin ang isa’t isa.
Sa halip, pagsapit ng buwan ng Oktubre hanggang Disyembre sa taon ding ito ng 2021, isang lalaking halos kasing edad mo rin ang darating. Dahil kailangan mo nang mag-asawa, gayundin dahil medyo may edad ka na, sa ayaw at sa gusto mo, sasagutin mo siya at magiging boyfriend at pagsapit ng 2022, sa buwan ng Mayo o Hunyo, makapag-aasawa ka na at magkakaroon ng simple, maunlad at maligayang panghabambuhay na pamilya (Drawing A. at B. 1-M arrow b.).