Namudmod sa mga drayber, dinumog… WILLIE, TAKBUHAN NG MGA WALANG PERA

ni Erlinda Rapadas - @Teka Nga! | September 17, 2020

Dahil balitang-balita ang ginagawang tulong at pagbibigay ng ayuda ng Wowowin host na si Willie Revillame sa mga jeepney drivers na nawalan ng pagkakakitaan, siya agad ang naiisip lapitan ng mga taong nangangailangan ng tulong.

Nagbigay din ng financial assistance si Kuya Willie sa mga pinalayas sa kanilang tinitirhan dahil walang pambayad ng upa. Marami rin ang araw-araw na nag-aabang at umaasa na matatawagan sila ni Willie at mabibigyan ng P10 thousand to P20 thousand. Malaking tulong na 'yun sa panahon ngayon na may Covid pandemic pa.

Nangako rin si Revillame na mamimigay ng tablets na magagamit ng mga mag-aaral sa kanilang online class.

'Pag nanonood ng Tutok to Win, marami ang nagdarasal na sila ay suwertehin, lalo na 'yung mga hindi pa nakakakuha ng SAP mula sa DSWD.

May mga senior citizens din na gustong manawagan kay Willie upang sila ay mabigyan ng tulong at ayuda. Tulad ng isang matandang cigarette vendor na taga-Cavite, nakikitira lang daw ito sa isang kaibigan sa Pasig at ang kanyang hanapbuhay ay ang magtinda ng sigarilyo kendi atbp. at laging laman ng kalye. Nag-viral nga ang matandang takatak nang i-post sa social media ang kanyang kalagayan.

For sure, kung napanood ito ni Revillame ay tutulungan din niya ang nasabing senior citizen.