Nakikinabang sa pangongotong, tuluyan!
ni Ryan Sison - @Boses | November 15, 2022
Sa kulungan ang bagsak ng dalawang dating tauhan ng Manila Traffic and Parking Bureau (MTPB) matapos mahuli sa akto na nanghuhuli at nangongotong sa mga motorista sa Pandacan, Maynila.
Base sa ulat ng Manila Police District-Special Mayors React Team (SMaRT), alas-3:00 ng madaling-araw nang magkasa ng operasyon ang Special Operations Group ng MTPB sa may Quirino Avenue sa Pandacan bilang bahagi ng kanilang kampanya laban sa mga dati nilang tauhan na nagpapanggap na traffic enforcers at nangongotong sa mga motorista.
Gayunman, nabatid na parehong dating miyembro ng MTPB ang mga suspek na nasibak sa trabaho dahil sa mga kaso ng pangongotong.
Nakasuot pa umano ng uniporme ng MTPB ang dalawang suspek nang mahuli sa akto, ngunit hindi makapagbigay ng ID at mission order ang dalawa, kaya dinakip ang mga ito at isinuko sa MPD-SMaRT.
Sasampahan ang mga ito ng kasong paglabag sa Usurpation of Authority of Official Functions and Illegal Use of Uniform and Insignia.
Sa totoo lang, hindi na bago ang pangongotong sa mga motorista at kahit matagal nang isyu ito, ang problema, imbes na mawala ay dumarami pa sila.
Maituturing itong korupsyon, kaya panawagan natin sa mga kinauukulan, paigtingin ang operasyon laban sa pangongotong dahil walang lugar sa gobyerno ang mga korup na tauhan.
Nakadidismaya dahil sa gawaing ito ay nadadamay ang mga tauhang maayos na nagtatrabaho at imbes na pagkatiwalaan ng taumbayan, nadurungisan ang kanilang imahe.
Gayunman, umaasa tayong magsisilbing babala ang insidenteng ito sa mga patuloy na nangongotong.
Bukod sa pagpapaigting ng operasyon, hangad nating patawan ng mabigat na parusa ang mahuhuling nangongotong. Panahon na para matigil ang ganitong gawain at mapanagot ang mga dapat managot.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com
Comments