Motor taxi rider, ginagawang drug courier, stop!

by Info @Editorial | September 3, 2026

Nakababahala ang lumalalang paggamit sa mga motor taxi rider bilang courier ng ilegal na droga. 

Sa likod ng mabilis at convenient na delivery service, nakahanap ang mga sindikato ng paraan upang maihatid ang kanilang kontrabando nang hindi agad napapansin. Ang masama, maaaring madamay maging ang rider na walang kamalay-malay sa tunay na laman ng ipinapadala sa kanya.

Hindi dapat gawing panangga ng mga drug dealer ang mga rider. Kung talamak na ang ganitong modus, kailangang kumilos nang mas agresibo ang pulisya at mga kumpanyang nagpapatakbo ng motorcycle taxi at delivery platforms. Hindi sapat ang simpleng verification ng pangalan at address kung ginagamit na mismo ang kanilang serbisyo sa bentahan at transportasyon ng droga.

Pero malinaw din: hindi lahat ng rider ay inosenteng biktima. Kung may rider na sadyang pumapayag na maghatid ng droga kapalit ng pera, hindi na siya ordinaryong delivery worker—bahagi na siya ng ilegal na operasyon. Dapat siyang managot sa ilalim ng batas, kasabay ng pagtugis sa mga sindikatong nasa likod nito.

Mabilis ang motor, pero hindi dapat mas mabilis ang sindikato kaysa batas. 

Kailangang higpitan ang seguridad, palakasin ang koordinasyon at putulin ang sistemang ginagawang “drug courier on demand” ang mga rider.