Mister na may kabit, ‘di na makakabalikan; bagong guy, makikilala abroad

ni Maestro Honorio Ong - @Kapalaran ayon sa Numero| January 27, 2021

Dear Maestro,

Nambabae ang mister ko noong OFW ako sa Hong Kong noong 2018 kaya naghiwalay kami at tuluyan siyang sumama sa kabit niya, at ngayon, nakikitira ako sa aking mga magulang.

Gusto kong malaman kung magkakabalikan pa ba kami at kung hindi, may lalaki pa bang darating sa buhay ko kahit may dalawa na akong anak?

Balak kong mag-abroad ulit, may ikalawang pag-a-abroad ba sa kapalaran ko? Kung mayroon, kailan ito mangyayari? September 19, 1977 ang birthday ko.

Umaasa,

Virgo Lady ng Caingin, Bocaue, Bulacan

Dear Virgo Lady,

Ayon sa zodiac sign mong Virgo, sa birth date na 19 o 1 (ang 19 ay 1+9=10/ 1+0=1), sa destiny number 7 (9+19+1977=2005/ 20+05=25/ 2+5=7), sadyang may ikalawa at mas mabungang pangingibang­-bansang itatala sa iyong kapalaran, at ito ay inaasahang maganap sa susunod na taong 2022 o 2023, sa buwan ng Setyembre hanggang Nobyembre. Kaya kung may aplikasyon ka sa abroad sa nasabing panahon, sigurdo ang magaganap – may ikalawang mas mabunga at mabiyayang pangingibang-bansang itatala sa iyong kapalaran.

Hinggil naman sa pag-ibig kung saan ang destiny number mong 7, ang nagsasabi ring ikaw ay makapag-aasawa sa ikalawang pagkakataon. Gayundin, ang nasabing pag-aasawa ay hatid ng lalaking isinilang sa zodiac sign na Libra o Taurus kung saan ang lalaking ito ay makikilala mo sa pangingibang-bansa. Sa ikalawang pag-aasawang nabanggit, tuluyan ka nang uunlad at habambuhay na magiging maligaya.