Mga senador sa Comelec: Voter’s registration, i-extend

ni Jasmin Joy Evangelista | September 16, 2021

Hinimok ng mga senador ang Commission on Elections (Comelec) na palawigin pa ang voter’s registration hanggang sa katapusan ng Oktubre.

Laman ng Senate Resolution No. 851 ang hiling na palawigin ng isang buwan ang voter registration na nakatakdang magtapos dapat sa Sept. 30.

Anila, ito ay para mapigilan ang pagkait sa mga tao sa karapatang makaboto dahil sa COVID-19 pandemic.

Dagdag pa nila, hindi naman daw makaaapekto sa preparasyon ng Comelec ang extension ng registration dahil sa mga nakalipas na eleksyon ay bandang Oktubre o lagpas pa ng Oktubre ang ginawang deadline ng pagpaparehistro.

Halimbawa umano ay ang mga sumusunod:

* 2001- voter registration deadline Dec. 27, 2000

* 2004- voter registration deadline Oct. 31, 2003

* 2007- voter registration deadline Dec. 31, 2006

* 2010- voter registration deadline Jan. 9, 2010

* 2013- voter registration deadline October 31, 2012.

* 2016- voter registration deadline Oct. 31, 2015

Kinilala rin anila ng Korte Suprema ang kapangyarihan ng Comelec na magtakda ng deadline sa voter registration basta hindi lalagpas sa 120 days bago ang aktwal na halalan.

Ayon pa sa mga senador, mahalaga na palawigin pa ang voter registration dahil sa mga nasayang na panahon dahil sa suspensiyon bunsod ng pandemya.