Mga poor, unahin sa COVID vaccine – Pope Francis

ni Lolet Abania | September 26, 2020

Nanawagan si Pope Francis sa lahat na mahihirap at mahihinang miyembro ng lipunan ang nararapat na unahin sa pagbibigay ng COVID-19 vaccine sakaling magkaroon na nito.

Sa isang video address ni Pope Francis sa U.N. General Assembly mula sa Vatican, aniya, ang pandemya na tumama sa buong mundo ay nagpapahiwatig ng agarang pagkakaroon ng tiyak at epektibong bakuna laban sa virus at kinakailangan ang pagsasagawa ng public health at safety sa lahat.

"If anyone should be given preference, let it be the poorest, the most vulnerable, those who so often experience discrimination because they have neither power nor economic resources," sabi ni Pope Francis.

Gayundin, ayon sa Pope, hindi dapat ipagkait ng mayayamang bansa ang Coronavirus vaccine dahil na rin sa babala ng World Health Organization (WHO) laban sa "vaccine nationalism", at sa halip, makiisa sa isang global pact na magpapamahagi ng bakuna sa lahat ng bansa.

Dagdag pa niya, mahigit sa 150 vaccines na ang idinedebelop. Tinatayang 24 dito ang nasa human trials at ang iba ay nasa late-stage trials na.

Paulit-ulit ding hinimok ni Pope Francis sa kanyang address ang mga mayayamang nasyon na bawasan o kalimutan na ang naging pagkakautang sa kanila ng mga naghihirap na bansa. Kailangan nang magbago ng economic at financial institutions upang mapabuti nila ang "respond to the rapidly growing inequality between the super-rich and the permanently poor."