Mga bomba, nahukay sa ginagawang gas station

ni Jeff Tumbado @News | June 10, 2026

Photo: Ang mga bomba o vintage bombs na nahukay sa ginagawang gasolinahan sa Barangay New Cabalan, Olongapo City nitong Lunes. (Jeff Tumbado)

Nagulantang ang mga naghuhukay ng lupa sa isang ginagawang konstruksyon ng gasolinahan dahil sa pagkakadiskubre sa mga piraso ng vintage bombs na pinaniniwalaang mula pa noong World War II sa Olongapo City.

Ayon sa purok leader ng Brgy. New Cabalan na si Bimbo Manarang, natuklasan ang mga bomba habang naghuhukay ang ilang construction workers sa lugar nitong Lunes ng umaga.

Agad namang ipinagbigay-alam sa pulisya ang insidente para sa beripikasyon at pagsusuri.

Sa inisyal na impormasyon, iba’t ibang uri ng lumang kagamitang pampasabog ang nahukay, subalit hindi pa matiyak sa ngayon ang eksaktong uri, kondisyon, at kung aktibo pa ang mga ito.

Dahil sa posibleng panganib, kinordonan pansamantala ang paligid at itinigil ang operasyon ng konstruksyon habang masusing sinusuri ng mga tauhan ng Explosive Ordnance Disposal (EOD) ang mga bomba.