Media, oks magdala ng baril — PNP

ni Jeff Tumbado @News | July 16, 2023

Nagpahayag ng pagsuporta ang liderato ng pambansang pulisya kaugnay sa pagdadala ng baril ng mga miyembro ng media na may banta sa kanilang buhay o seguridad.

Ito ang inihayag ni Philippine National Police (PNP) Chief General Benjamin Acorda, Jr. sa isang ambush interview sa pagbubukas ng kauna-unahang Invitational Shootfest na pinangunahan ng PNP Press Corps sa Camp Karingal, sa Quezon City.

Ayon kay Acorda, layon nito na maprotektahan ang mga mamamahayag na kadalasang nagiging biktima ng mga pag-atake nang may kaugnayan sa kanilang mga trabaho.

Ito umano ang dahilan kung bakit mahalagang magkaroon ng pansariling proteksyon ang media laban sa mga posibleng banta sa kanilang buhay nang dahil sa kanilang propesyon.

Kasabay nito, inanunsyo rin ng heneral na bibigyan ng special accommodation ang mga mamamahayag para sa pagkuha ng Permit to Carry Firearms Outside Residence (PCFOR).

Habang pinag-aaralan na rin ng PNP ang pagpapababa pa ng babayarang fee sa naturang permit para sa lahat ng miyembro ng media upang maging kasing halaga na lang nito ang presyo ng fee na iniaalok para sa mga tauhan ng gobyerno.