May nakaaway sa iskul... Grade 10, nagdala ng baril, huli

ni Jeff Tumbado @News | July 3, 2026

Photo: PRO-6

Nasamsaman ng kalibre .38 na revolver at anim na bala mula sa isang 15-anyos na Grade 10 student sa loob ng isang paaralan sa Barotac Nuevo, Iloilo noong Martes.

Sa ulat ng Iloilo Police Provincial Office (IPPO), nakatanggap ng impormasyon ang isang guro na may dalang baril ang estudyante, kaya agad na humingi ng tulong sa pulisya at Municipal Social Welfare and Development Office (MSWDO).

Sa isinagawang inspeksyon sa bag ng menor-de-edad sa tanggapan ng guidance counselor, narekober ng mga awtoridad ang baril at mga bala.

Ayon sa ina ng estudyante, nabatid niyang nabugbog umano ang kanyang anak noong nakaraang buwan matapos magkaroon ng alitan sa ilang indibidwal.

Isinailalim na sa pangangalaga ng Department of Social Welfare and Development (DSWD) ang menor-de-edad habang nagpapatuloy ang imbestigasyon, samantalang sinabi ng Department of Education (DepEd) na patunay ang insidente na epektibo ang pinaigting na seguridad sa mga paaralan.