Mali ang akala ng mga DDS na maghihirap ang pamilya Lopez kapag hindi nabigyan ng...

prangkisa ang ABS-CBN

ni Pablo Hernandez III - @Prangkahan | July 6, 2020

KAHIT HINDI MABIGYAN NG PRANGKISA ANG ABS-CBN, SUPER-RICH PA RIN ANG PAMILYA LOPEZ—Kung inaakala ng mga DDS na maghihirap ang pamilya Lopez kapag hindi na-renew ang prangkisa ng ABS-CBN ay nagkakamali sila.

Super-rich ng pamilya Lopez at ang ABS-CBN ay isa lamang sa sangkaterba nilang negosyo, period!

◘◘◘

HIGIT 11K WORKERS AT TALENTS NG ABS-CBN ANG TATAMAAN KAPAG TULUYANG NAGSARA ANG ABS-CBN—Bukod sa ABS-CBN, ang ilan pa sa mga negosyo ng Lopez Group of Companies ay ang Bayad Center, Asian Eye Institute, Securities Transfer Services, ADTEL, INAEC Aviation; Sky Vision na may kontrol sa Sky Cable, Star Cinema, Star Records; mga negosyo sa power generations and distribution tulad ng First Philippines Holdings., First Gen., First Gas Holdings, First Gas Power, FGP, FG Hydro Power, FG Bukidnon Power, First Gen. Renewables, Energy Development; Panay Electric Company; real estate business na Rockwell Land, First Philippine Park, First Philippine Realty, Terra Prime, First Sumiden Realty; sa infrastructures na First Balfour, First Philippine Industrial; manufacturing na First Philippine Electric, Philippine Electric, First Electro Dynamics, First Philippine Power System, First Sumiden Circuits at First Philec Solar.

Kaya kapag nanaig ang kagustuhan nina P-Duterte, SolGen Jose Calida, Sagip Partylist Rep. Rodante Marcoleta, Kalusugan Partylist Rep. Mike Defensor at Cavite Rep. Jesus Crispin Remulla na hindi na bigyan ng prangkisa ang ABS-CBN, walang epekto ‘yan sa pamumuhay ng pamilya Lopez kasi ang maaapektuhan lamang ay ang higit 11K workers at talents ng Kapamilya network na mawawalan ng hanapbuhay sa panahon ng krisis dulot ng pandemyang COVID-19, boom!

◘◘◘

TALUPAN KUNG SINO ANG NAKIKINABANG SA “UNDER THE TABLE TAX” NG MGA POGO—Ayon kay DFA Sec. Teodoro “Teddy Boy” Locsin Jr., ang pagbabayad diumano ng “tax” ng Philippine Offshore Gaming Operators (POGO) na pagmamay-ari ng mga Chinese ay idinadaan sa “under the table.”

Aba, dapat imbestigahan ‘yan ng Senado nang sa gayun ay malaman kung kaninong “lamesa” dumaan ang ibinayad na buwis ng mga may-ari ng POGO, boom!

◘◘◘

PARA HINDI MABANSAGANG TERORISTA, DAPAT MANAHIMIK NA LANG ANG MAMAMAYAN—“Kung tahimik ka, huwag mabahala.” Ito ang mensahe sa taumbayan ni Presidential Security Adviser Hermogenes Esperon matapos lagdaan ni P-Duterte para maging ganap na batas ang “Anti-Terrorism” Act of 2020.

Ganu’n? Parang sinabihan na rin ni Esperon ang taumbayan na para hindi maparatangang terorista, itikom na lang ang bibig kapag may mga maling polisiya, korupsiyon at pang-aabusong gawin ang pamahalaan, buwisit!