Maharlika Fund ‘pag nalugi o nakurakot, lahat ng pumirma dapat managot

ni Ryan Sison @Boses | June 24, 2023

Siniguro ni Pangulong Ferdinand “Bongbong” Marcos Jr. na pipirmahan niya kaagad ang Maharlika Investment Fund (MIF) sa oras na dumating na ito sa Palasyo.

Ito ay matapos na itanong ng media ang tungkol sa bersyon ng MIF dahil lumusot ito sa ikatlo at huling pagdinig ng Senado at Kamara.

Dagdag ni Marcos, karamihan sa binago ay tungkol sa safety at security funds dahil dito umano nag-aalala ang mga tao.

Kabilang sa iminungkahi ng Pangulo na tanggalin sa panukala ng Kamara ay ang maging bahagi ng board ang Presidente, chairman ng Central Bank at Department of Finance.

Giit niya, kung maglalagay ng corrupt sa investment fund ay maaaring mawala ang pera, pero kung mahusay ang hahawak, maaaring lumaki ang pondo.

Matatandaang tinawag na ‘biggest investment scam’ itong MIF dahil isusugal ng gobyerno rito ang kaban ng bayan.

Puwedeng kumita ito o malugi, bagay na pinangangambahan ng mamamayan.

Ang tanong nating lahat, bakit kailangan itong madaliin kung may sapat namang panahon para suriin ito bago ipasa?

Maraming mali sa panukalang ito kaya tutol ang taumbayan, kaya’t mas maganda na suriin munang maigi bago gawing batas.

Nananawagan tayo sa gobyerno na sana ay huwag maabuso ang kaban ng bayan at huwag puro pangako.

At kung sakaling mawaldas ang pera ng bayan, dapat ding papanagutin ang lahat ng mga pumirma sa Maharlika Investment Fund.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com