Magsayo, basta kampeon ng Featherweight kakasahan

ni Gerard Arce - @Sports | September 18, 2021

Kahit sinong kampeon sa featherweight division ay puwedeng kaharapin ni Filipino undefeated contender Mark “Magnifico” Magsayo – ngunit kung mapagbibigyan ay nais talaga nitong makalaban si WBC 126-pound titlist Gary Russell Jr. ng U.S.

Kasunod ng impresibong 10th round knockout victory ng 26-anyos na tubong-Tacloban City kay Mexican Julio Ceja para sa WBC title eliminator noong Agosto, nananatiling buo ang pagnanais ni Magsayo (23-0, 16KOs) na matupad ang pinapangarap na harapin ang long-time WBC champion.

“I want the WBC title, of course,” wika ni Magsayo sa BoxingScene.com. “If Gary Russell’s not moving up, I want to fight him. If I have an opportunity to fight Gary Russell, then my dream fight would come true.”

Limang beses ng matagumpay na nadedepensahan ng 2005 Mianyang World Championships bronze medalist na si Russel Jr. (31-1, 18KOs) ang koronang nahawakan sapul pa noong Marso 28, 2015 laban kay Mexican Jhonny Gonzalez via 4th round TKO victory. Mula noon ay naidepensa niya ang titulo kina Patrick Hyland ng Ireland (2nd rnd KO), Oscar Escandon ng Colombia (7th TKO), Joseph Diaz (UD), Kiko Martinez ng Spain (5th TKO) at UD win kay Tugstsogt Nyambayar ng Mongolia.

Noon pang Pebrero 2020 huling beses sumabak ang Washington D.C. native laban kay Nyambayar sa Pennsylvania para higitan niya sa puntusan ang dating undefeated opponent sa 12-round battle.“Because he fights once a year,” wika ni Magsayo. “That’s why he has held the title the longest.”

Gayunpaman, hindi man mapagbigyan si Magsayo, na nasa pangangasiwa ng MP Promotions ni 8th-division World titlist Manny ‘Pacman” Pacquiao, na makalaban ang American boxer, maganda pa rin ang ranggo nito sa WBO title ni Mexican Emmanuel “El Vaquero” Navarette (34-1, 29KOs) na nakapuwesto bilang No.2 contender.