Magsasaka, tinaga ang kinakasama matapos tanggihan sa pakikipagtalik

by BRO @News | October 1, 2026

Photo: FIle

Arestado ang isang 34-anyos na magsasaka matapos umanong tagain ang kanyang 37-anyos na kinakasama matapos itong tumanggi sa kanyang hiling na makipagtalik sa Alcoy, Cebu.

Nangyari ang insidente alas-4:55 ng hapon noong Martes, Setyembre 29, sa Sitio Cansili, Barangay Nug-as. Malubhang nasugatan ang biktima sa ulo, mukha at braso at dinala sa Vicente Sotto Memorial Medical Center.

Ayon sa pulisya, nag-away ang dalawa bago ang insidente dahil sa pagtanggi ng biktima sa hiling ng suspek. Selos umano ang posibleng motibo sa pananaga.

Nakita ng isang 19-anyos na saksi ang suspek na paulit-ulit na sinasaktan ang biktima gamit ang isang patalim. Nang tangkain niyang tumulong, tinutukan din siya ng suspek.

Nagtago muna ang suspek sa kagubatan bago kusang sumuko kinabukasan. Nahaharap siya sa kasong frustrated homicide.