Magsasaka, patay nang suwagin ng kalabaw

ni Lolet Abania | July 28, 2020

Wala nang buhay ang isang magsasaka matapos na suwagin umano ito ng alagang kalabaw sa Paracale, Camarines Norte.

Kinilala ng Paracale Police ang biktimang si Arnold Bonito, 61-anyos na natagpuang patay kahapon sa madamong bahagi ng Sitio Malapingan sa Barangay Pinagbirayan Munti, kung saan anim na kilometro ang layo mula sa kanyang bahay.

Sa tinamong sugat sa katawang ni Bonito, pinaniniwalaan na ang alaga niyang kalabaw ang gumawa nito hanggang sa siya ay mamatay.

“Ang suspek nila ‘yung kalabaw at matapang daw ‘yung dalawang inaalagaan na kalabaw nitong may-ari,” ayon sa acting chief ng Paracale Police na si P/Maj. Elezaldy Calingacion.

Plano nang ibenta ng mga kamag-anak ni Bonito ang kalabaw upang hindi na umano makapaminsala pa, ayon pa kay Calingacion.