Magsasaka, lugmok din sa taas-presyo ng langis

by Info @Editorial | April 16, 2026

Habang tumataas ang presyo ng petrolyo, tumitindi rin ang pagdurusa ng mga magsasaka. Pero ang mas nakababahala, tone-toneladang ani ang nasasayang dahil hindi ito maihatid sa pamilihan.

Diretso ang problema—mahal ang gasolina, mahal ang transportasyon. Dahil dito, mas pinipili na lang ng ilang magsasaka na hayaang mabulok ang kanilang ani kaysa malugi sa pagbibiyahe. 

Sa huli, sila ang lugi, at ang mamamayan ay kulang sa pagkain.

Hindi na ito bagong isyu. Paulit-ulit na itong nangyayari, pero kulang pa rin ang konkretong aksyon. 

Nasaan ang sapat na cold storage? Nasaan ang maayos na farm-to-market roads? Nasaan ang tulong sa gastos sa transportasyon?

Kung may malinaw na sistema at suporta, hindi masasayang ang pagkain. Pero sa kasalukuyan, tila pinababayaan ang sektor ng agrikultura habang patuloy na tumataas ang presyo ng langis.

Hindi lang krisis sa petrolyo ang problema kundi kakulangan sa mabilis at seryosong aksyon.

Kung hindi kikilos ngayon, patuloy lang masasayang ang ani at mas lalong malulugmok ang mga magsasaka.