Mag-live-in partner, pinagbabaril sa loob ng bahay

ni Maeng Santos @News | September 11, 2026

Photo: File

Malubha ang 40-anyos na babaeng barangay staff at kanyang live-in partner nang pasukin at pagbabarilin ng hindi pa kilalang suspek Miyerkules ng gabi sa Valenzuela City.

Ginagamot sa ospital ang mga biktimang sina si alyas Jose, 42, caretaker, sanhi ng tinamong tama ng bala sa kanang pisngi habang sa leeg naman nahagip ang kanyang ka-live-in na si “Rose,” staff ng barangay.

Sa ulat ni Valenzuela Police Chief P/Col. Joseph Talento kay NPD Director P/BGen. Benliner Capili, nag-iinuman sa loob ng kanilang bahay sa Brgy. Mapulang Lupa ang dalawa, kasama ang mga kaibigan nang biglang pumasok ang suspek, alas-11:45 ng gabi at tinanong si “Jose” kung bakit hindi siya kasama.

Nang sabihin ni “Jose” na hindi niya alam ang sinasabi ng suspek, agad naglabas ng baril ang gunman at pinagbabaril ang mga biktima bago tumakas sakay ng motorsiklo.