LGU officials, 'wag kampante sa COVID

@Editorial | August 15, 2022

Patuloy ang pagtaas ng kaso ng COVID-19.

May ulat na nadaragdagan ang mga naoospital dahil sa nakahahawang sakit.

Kaya sa kabila ng unti-unting pagluwag, palaging paalala na mas mag-ingat.

Pinagsabihan na rin ang mga local government units (LGUs) na palakasin pa ang pagpapatupad ng mga health protocols.

Sa projections ng Department of Health (DOH), ang mga COVID-19 cases ay maaaring umabot sa 10,600 kada araw pagsapit ng buwan ng October.

Sa huli namang pagtala ng DOH, umaabot sa 4,661 ang mga nai-record na mga bagong kaso ng COVID cases. Ito na ang highest ngayong linggo.

Umaapela rin sa mga LGUs na hindi dapat mag-relax at dapat ang mga local executives ang manguna sa laban kontra pandemya.

Huwag hintaying lumala pa ang sitwasyon. Bukod sa mga ipinatutupad ng health protocols, mag-isip din tayo ng iba pang paraan para makaiwas sa virus.

Wala nang lockdown, kaya huwag nang pasaway.

Dapat kabisado na natin ang senaryo sakaling may kasamang nahawahan o tayo mismo ang nagpositibo.

Walang higit na makatutulong kundi ang pag-iingat at pag-aalaga sa sarili.

Lalo na ngayong magbabalik-eskwela na ang mga anak, may iba na face-to-face classes na, bantayan natin silang maigi, paalalahanan hanggang sa makasanayan na ang pamumuhay nang may banta ng COVID.