Suporta sa atleta, hindi lang kapag may medalya

by Info @Editorial | October 1, 2026

Madaling ipagmalaki ang atletang Pinoy kapag may medalya na. Pero bago ang tagumpay ay taon ang ensayo, sakripisyo at gastusin—madalas habang kapos sa pondo, kagamitan at pasilidad.

Ang tunay na suporta sa sports ay hindi puro congratulatory post, bonus at photo opportunity pagkatapos ng tagumpay. Kailangan itong maramdaman habang naghahanda pa lamang ang atleta: sapat at napapanahong pondo, mahusay na coaching, sports science, medical care, maayos na pasilidad at malinaw na programa mula sa grassroots hanggang sa elite level. 

Kung seryoso tayong makipagsabayan sa mundo, kailangang seryoso rin ang investment bago pa man sumabak ang atleta. 

Hindi dapat personal na problema ng atletang Pinoy kung saan kukuha ng pamasahe, pagkain, kagamitan o perang pang-training habang dala niya ang pangalan ng Pilipinas. 

Ang medalya ay bunga ng paghahandang nagsisimula nang maraming taon bago ang podium. Kaya kung gusto nating patuloy na marinig ang “Lupang Hinirang” sa pinakamalalaking paligsahan sa mundo, suportahan natin ang mga atleta hindi lamang kapag nagwagi—kundi lalo na habang lumalaban pa.