Kung sina Angel at Sarah, dahil sa charity works…

ANNE AT VICE, PASOK SA FORBES 100 DIGITAL STARS DAHIL SA 16 M AT 17 M FOLLOWERS SA SOCMED

ni Ador V. Saluta - @Adore Me! | December 10, 2020

Pito ang bilang ng mga Pinoy celebrities na nakasali sa 100 Digital Stars List ng Forbes Asia.

Anim na Kapamilya stars ang kabilang dito — sina Sarah Geronimo, Anne Curtis, Vice Ganda, Angel Locsin, Kathryn Bernardo at Kim Chiu — at tanging si Marian Rivera lamang ang Kapuso star na pasok sa binansagang "Magnificent 7".

Kabilang din sa listahan ng 100 Digital Stars ng Forbes Asia sina Mauro Maurer at Urassaya Sperbund ng Thailand; Lee Min-ho, Kim So-Hyun, Lee Dong-wook, ang K-pop groups na BTS at BLACKPINK ng South Korea; Hugh Jackman, Chris Hemsworth at Keith Urban ng Australia; Shahid Kapoor ng India; at Jay Chou ng Taiwan.

Pawang mga singers, banda, film at TV stars mula sa Asia-Pacific region na itinuturing na trailblazer, most influential, makapangyarihan ang social media presence at milyun-milyon ang bilang ng mga tagasubaybay ang ilan sa basehan na ginamit ng Forbes Asia sa pagpili ng 100 Digital Stars.

"We’ve given special focus to celebrities who, despite cancelled physical events and activities, managed to remain active and relevant, largely by using social media to interact with their fans, raise awareness and inspire optimism.

"Many also used their influence to help worthy causes, especially those with a Covid-19 focus.

"To determine the finalists, Forbes Asia evaluated the candidates’ combined social media reach and engagement.

"We also considered their recent work, impact and advocacy, brand endorsements and business endeavors, and their recognition profile on a local, regional and global level. Only those active in film, music, and TV were eligible," paliwanag ng Forbes Asia tungkol sa kanilang basehan sa pagpili ng mga personalidad na kasali sa listahan.

Napasali si Sarah Geronimo dahil sa kanyang 2018 hit film na Miss Granny na nagpanalo sa kanya ng Best Actress award sa Philippine Movie Press Club noong nakaraang taon, 2019.

Nabanggit din ang duet nila ng mister niyang si Matteo Guidicelli sa isang COVID-19 benefit concert noong Marso, na nakalikom ng roughly $5 million!

Si Anne Curtis ay inilarawan bilang "the Philippines’ most popular Instagram celebrity" dahil sa kanyang 16 million followers. Binanggit din ang kanyang endorsement deals sa ilang malalaking kumpanya.

Ang co-star ni Anne sa 2019 hit film na The Mall, The Merrier na si Vice Ganda ay pinarangalan bilang Best Male TV Host sa PMPC Star Awards for TV.

Ayon pa sa Forbes, si Vice ay "one of the most popular male celebrities in the Philippines" na may 17 million followers sa Facebook.

Si Marian Rivera, ayon sa Forbes, ang "Philippines’ most popular celebrity on Facebook" dahil sa kanyang 23 million followers. Bagama't hindi raw napapanood ang Kapuso actress sa TV at pelikula simula nang ipinanganak ang second child na si Ziggy noong 2019, aktibo naman daw ito sa social media at endorser ng iba't ibang brands.

Dahil sa kanyang 19 million followers, si Angel Locsin ang "second most popular Filipina celebrity on Facebook." Binangit ng Forbes ang kanyang hit primetime series sa ABS-CBN na The General’s Daughter, kung saan nanalo siyang Best Drama Actress sa Star Awards for TV noong 2019.

Hindi rin nakaligtaan ng Forbes na banggitin ang pagdo-donate ni Angel ng humigit-kumulang P15 million ($310,000) nitong nakalipas na dekada sa iba't ibang causes, na siyang dahilan para mapabilang siya sa Heroes of Philanthropy list noong 2019. Kamakailan ay tumulong si Angel na makalikom ng P11.3 million para sa pagbili ng 246 hospital tents para sa medical workers na nakikipaglaban sa pandemya.

Si Kathryn Bernardo ay nagbida sa dalawa sa highest-grossing films sa Pilipinas, ang The Hows of Us (katambal si Daniel Padilla noong 2018) at Hello, Love, Goodbye (katambal si Alden Richards noong 2019). Kumita ang dalawang pelikula ng roughly $20 million (equivalent to P1-B plus).

Wagi rin bilang Film Actress of the Year si Kathryn sa Box Office Entertainment Awards last October para sa HLG.

Napasama si Kim dahil sa kanyang viral video gaffe at sa live performance ng kantang Bawal Lumabas, ang kanyang naging pambato kung saa'y nakapagtala ito ng 9-M views.