Kung kelan 1 yr. na… SEN. WIN, UMAMING HIWALAY NA SILA NI BIANCA

ni Beth Gelena @Bulgary | January 25, 2026

Photo: I Win Gatchalian

Nainterbyu ni Korina Sanchez si Sen. Win Gatchalian nang tahasan niyang nabanggit ang ‘non-existent’ niyang pag-ibig. 

Ang tinutukoy niya ay ang hiwalayan nila ng girlfriend na si Bianca Manalo. Isang taon na ring hiwalay ang dalawa, ngunit ngayon lang nagsalita ang senador.

Nagulat ang mga manonood nang tahasan niyang inilarawan ang kanyang kasalukuyang buhay-pag-ibig. 

Bagama’t may mga espekulasyon tungkol sa kanilang paghihiwalay simula noong huling bahagi ng 2024, ito ang unang pagkakataon na hayagang nagpahiwatig si Gatchalian na siya ay single.

Inimbitahan ng Bilyonaryo News Channel (BNC) ang senador upang pag-usapan ang pambansang badyet. Sa programang On Point ng BNC, tinanong siya hinggil sa mga batas at badyet sa Senado ngayong 2026 at sa isang imbestigasyon sa korupsiyon sa pagkontrol ng baha.

Sa pagtatapos ng sesyon, iniba ni Korina ang tono at pabirong nagtanong, “Oo nga pala, ang buhay-pag-ibig mo, kumusta?”

Hindi umiwas si Gatchalian at prangkang sumagot ng “(Non-existent) wala naman,” na ikinagulat ni Korina.

“Nagbibiro lang ako. Hindi ko inakalang sasagot ka pa,” sabi niya habang tumatawa. 

Kalaunan ay pinuri niya ang senador, sinabing mukhang blooming ito, na pabirong sinagot ni Win, “Ilaw lang ‘yan. Gabi na, eh.”

Agad itong nag-viral at muling naging usapan ang love life niya.

---

Marami ang naka-relate sa post ni Ogie Alcasid sa Instagram na urong-sulong sa pagbabayad ng tax dahil sa pag-aalala na baka nakawin lang ng ilang nakaupo sa gobyerno.

Ani Ogie, humihingi na siya ng tulong kay Lord para sa problemang ito ng ‘Pinas sa korupsiyon.

“We deserve honest government!” wika pa ni Ogie.

Ilan sa mga komento ng mga netizens:

“Surely there are many in your industry who are big taxpayers like you and share the same sentiments.”

“Tama, Sir Ogie. Prayer is the best way.”

“Talagang sasama ang loob mo lalo na ‘pag milyon ang tax. Eto na ‘yung panahon na mas lalo tayong lumapit kay God at ipagdasal ang mga nangyayari sa bansa natin.”

“Nasa tax code kasi ‘yan. Ang kailangan natin, kung saan napupunta ang nakokolektang taxes. Parusahan ang may kasalanan.”

O ayan, parusahan daw ang may sala, kaso nasa harap na raw ang mga nangungurakot sa kaban ng bayan, panay imbestiga pero hindi pa rin nakukulong ang dapat makulong.

Hay, naku, ‘ika nga, only in the Philippines…

---

IPINASILIP ni Belle Mariano ang ilan sa magaganda at eleganteng sulok ng kanyang napakalaking tahanan. Dalawang taon ang ginugol sa konstruksiyon ng kanyang dream house.

Batay sa mga larawang ibinahagi niya sa Instagram (IG), minimalist ang disenyo ng bahay. Maluwag at may mataas na kisame ito, kung saan pumapasok ang natural na liwanag mula sa malalawak na bintana. 

Kapansin-pansin ang Limbo Hoop Hanging Lamp ng kilalang Pilipinong industrial designer na si Kenneth Cobonpue na bumabati sa mga bisita, pati na ang iba pang eskultural na detalye na tumutugma sa estetika ng bahay.

Sa kanyang bagong post, ibinahagi niya ang mas maraming sulyap sa mga eleganteng detalye sa loob ng tahanan. Sa isang serye ng mga larawan, makikita ang maliwanag at modernong espasyo mula sa itaas.

Pinakanakakapukaw-pansin ang malalaking eskultural na pendant lights na may geometric, parang-orb na metal frames at maiinit na bumbilya sa loob, na nakasabit sa iba’t ibang taas. Maaliwalas ang kabuuang ayos ng kabahayan, na may marangya, moderno, at makabagong dating.