Kuliglig nakaladkad ng pickup, driver utas

by Janice Baricuatro @News | November 8, 2026

Photo: File

Nasawi ang isang driver ng kuliglig matapos masabitan at makaladkad ng isang puting pickup truck na tumakas matapos ang insidente sa Tagaytay-Sta. Rosa Road, Silang, Cavite, kamakalawa.

Kinilala ang biktima na si alyas Armando, 55, ng Brgy. Pooc 1, Silang. Hindi pa nakikilala ang driver ng pickup na tumakas matapos ang insidente.

Batay sa imbestigasyon, sakay ang biktima ng kuliglig na may kargang saging habang binabagtas ang naturang kalsada patungong Tagaytay City. Nang mag-overtake ang kasunod na puting pickup na walang nakuhang plaka, nasabitan nito ang kuliglig at nakaladkad nang may 50 metro bago kumalas.

Sa halip na huminto, nagpatuloy sa pagtakbo ang driver ng pickup. Isinugod sa pagamutan ang biktima ngunit idineklarang dead-on-arrival. Nakuha na ng pulisya ang CCTV footage sa lugar at tinutugis na ang driver.